ഭുവനേശ്വർ: ഒഡീഷയിൽ 'അർണാബ്' ചുഴലിക്കാറ്റിനെത്തുടർന്നുണ്ടായ കനത്ത മഴയിലും മണ്ണിടിച്ചിലിലും ഒമ്പത് മാസം പ്രായമുള്ള കുഞ്ഞ് ഉൾപ്പെടെ ഒരു കുടുംബത്തിലെ മൂന്ന് പേർക്ക് ദാരുണാന്ത്യം. കന്ധമാൽ ജില്ലയിലെ റൈക്കിയ ബ്ലോക്കിലുള്ള ഡംഗേസി ഗ്രാമത്തിലാണ് വെള്ളിയാഴ്ച ദുരന്തമുണ്ടായത്. അച്യുത പ്രധാൻ (30), ഭാര്യ അനിഷ പ്രധാൻ (25), ഇവരുടെ കുഞ്ഞ് എന്നിവരാണ് മരിച്ചത്; മണ്ണിടിച്ചിലിൽ കുടുങ്ങിയ മറ്റ് രണ്ട് പേരെ ഫയർഫോഴ്സ് സംഘം രക്ഷപ്പെടുത്തി സുരക്ഷിത സ്ഥാനത്തേക്ക് മാറ്റിയതായി ജില്ലാ കളക്ടർ വേദഭൂഷൺ അറിയിച്ചു.
മരണത്തിൽ മുഖ്യമന്ത്രി മോഹൻ ചരൺ മാജി അനുശോചനം രേഖപ്പെടുത്തുകയും മരിച്ചവരുടെ കുടുംബങ്ങൾക്ക് മുഖ്യമന്ത്രിയുടെ ദുരിതാശ്വാസ നിധിയിൽ നിന്ന് നാല് ലക്ഷം രൂപ വീതം സാമ്പത്തിക സഹായം പ്രഖ്യാപിക്കുകയും ചെയ്തു. സ്ഥിതിഗതികൾ നിരീക്ഷിക്കാൻ ദുരന്തനിവാരണ സേനയെ നിയോഗിച്ചിട്ടുണ്ടെന്നും അപകടമേഖലയിൽ നിന്ന് 450-ഓളം ആളുകളെ ഒഴിപ്പിച്ച് ദുരിതാശ്വാസ ക്യാമ്പുകളിലേക്ക് മാറ്റിയതായും മന്ത്രി റാബി നാരായൺ നായിക് വ്യക്തമാക്കി.
വ്യാഴാഴ്ച മുതൽ ഒഡീഷയുടെ തീരദേശ-ഉൾനാടൻ മേഖലകളിൽ ആഞ്ഞുവീശുന്ന അർണാബ് ചുഴലിക്കാറ്റ് വൻ നാശനഷ്ടങ്ങളാണ് വിതച്ചത്. ഗഞ്ചം ജില്ലയിലാണ് ഏറ്റവും കൂടുതൽ നാശനഷ്ടങ്ങൾ റിപ്പോർട്ട് ചെയ്യപ്പെട്ടത്; ഗജപതി, കന്ധമാൽ ജില്ലകളിലും വ്യാപക നാശനഷ്ടങ്ങൾ സംഭവിച്ചിട്ടുണ്ടെന്ന് ഔദ്യോഗിക വൃത്തങ്ങൾ സ്ഥിരീകരിച്ചു.
