ലഖ്‌നൗ: 2027-ലെ ഉത്തർപ്രദേശ് നിയമസഭാ തെരഞ്ഞെടുപ്പിന് മുന്നോടിയായി ബിജെപിയും സമാജ്‌വാദി പാർട്ടിയും തമ്മിൽ നടന്ന നിർണ്ണായകമായ ലെജിസ്ലേറ്റീവ് കൗൺസിൽ (എംഎൽസി) തെരഞ്ഞെടുപ്പിൽ ബിജെപിയെ അട്ടിമറിച്ച് പ്രധാന മണ്ഡലങ്ങളിൽ എസ്പിക്ക് ജയം. ആകെയുള്ള 11 സീറ്റുകളിൽ ആറെണ്ണത്തിൽ ബിജെപി വിജയിച്ചപ്പോൾ, വാരാണസിയിലെ രണ്ടും ലഖ്‌നൗവിലെ ഗ്രാജ്വേറ്റ്സ് മണ്ഡലവും ഉൾപ്പെടെ അഞ്ച് സീറ്റുകൾ സമാജ്‌വാദി പാർട്ടി പിടിച്ചെടുത്തു.

തെരഞ്ഞെടുപ്പ് ഫലം വന്നതിന് പിന്നാലെ, ഇത് സാധാരണ ജനങ്ങളുടെ പൊതുവിധിയല്ലെന്നും വിദ്യാസമ്പന്നരായ വോട്ടർമാരുടെ അഭിപ്രായം മാത്രമാണെന്നും യുപി മന്ത്രി ഓം പ്രകാശ് രാജ്ഭർ പ്രതികരിച്ചു. ജനവിധിയെ സ്വാഗതം ചെയ്യുന്നുവെന്നും എന്നാൽ നിയമസഭാ തെരഞ്ഞെടുപ്പ് നടക്കുമ്പോൾ ഇതേ വിദ്യാസമ്പന്നർ വോട്ട് ചെയ്യാൻ എത്താറില്ലെന്നും അന്ന് സാധാരണ വോട്ടർമാരാണ് ബൂത്തുകളിൽ ഉണ്ടാവുകയെന്നും അദ്ദേഹം അവകാശപ്പെട്ടു.

വാരാണസി ഗ്രാജ്വേറ്റ്സ് മണ്ഡലത്തിൽ എസ്പി സ്ഥാനാർത്ഥി അശുതോഷ് സിൻഹ 55,046 വോട്ടുകൾ നേടിയാണ് ബിജെപിയുടെ കേദാർ നാഥ് സിംഗിനെ പരാജയപ്പെടുത്തിയത്. വോട്ടെണ്ണലിന്റെ ഒമ്പതാം റൗണ്ടിൽ കേദാർ നാഥ് സിംഗ് 33,478 വോട്ടുകൾ നേടിയപ്പോൾ 50,462 വോട്ടുകളുമായി അശുതോഷ് സിൻഹ വ്യക്തമായ ലീഡ് നേടിയിരുന്നു; ഇതിനുപിന്നാലെ സോഷ്യൽ മീഡിയയിലൂടെ പരാജയം സമ്മതിച്ച കേദാർ നാഥ് സിംഗ് ജനവിധി വിനയത്തോടെയും ജനാധിപത്യപരമായും അംഗീകരിക്കുന്നതായി കുറിക്കുകയും വോട്ടർമാർക്ക് നന്ദി അറിയിക്കുകയും ചെയ്തു.

പാർട്ടി കൂടുതൽ സീറ്റുകൾ വിജയിക്കുമെന്നാണ് പ്രതീക്ഷിച്ചിരുന്നതെന്നും വിജയിക്കാൻ പാടില്ലാത്ത ഇടങ്ങളിൽപ്പോലും എസ്പി ജയിച്ചുകയറിയെന്നും ഉപമുഖ്യമന്ത്രി കേശവ് പ്രസാദ് മൗര്യ പ്രതികരിച്ചു. ബിജെപി മുൻകാല പ്രകടനം ആവർത്തിച്ചെങ്കിലും ഫലങ്ങൾ വിശദമായി അവലോകനം ചെയ്ത് വരാനിരിക്കുന്ന തെരഞ്ഞെടുപ്പുകളിൽ പ്രകടനം മെച്ചപ്പെടുത്താൻ പ്രവർത്തിക്കുമെന്നും അദ്ദേഹം കൂട്ടിച്ചേർത്തു.