ചെന്നൈ: സൺറൈസേഴ്സ് ഹൈദരാബാദ് സഹ ഉടമ കാവ്യ മാരനും പ്രശസ്ത സംഗീത സംവിധായകൻ അനിരുദ്ധ് രവിചന്ദറും നവംബറിൽ വിവാഹിതരാകുന്നു. നവംബർ 21-ന് ചെന്നൈയിൽ വെച്ച് നടക്കുന്ന വിവാഹ സൽക്കാരത്തിലേക്ക് പ്രധാനമന്ത്രി നരേന്ദ്ര മോദി, തെലങ്കാന മുഖ്യമന്ത്രി എ. രേവന്ത് റെഡ്ഡി, തമിഴ്നാട് മുഖ്യമന്ത്രി സി. ജോസഫ് വിജയ് എന്നിവരെ ക്ഷണിച്ചു.
സൺ ഗ്രൂപ്പ് ചെയർമാൻ കലാനിധി മാരനും ഭാര്യ കാവേരി മാരനും അനിരുദ്ധിന്റെ മാതാപിതാക്കളായ നടൻ രവി രാഘവേന്ദ്ര, ലക്ഷ്മി രവിചന്ദർ എന്നിവർക്കൊപ്പം നേരിട്ടെത്തിയാണ് പ്രധാനമന്ത്രിയെ ക്ഷണിച്ചത്. ദളപതി വിജയ് എന്നറിയപ്പെടുന്ന തമിഴ്നാട് മുഖ്യമന്ത്രി ജോസഫ് വിജയിയെ സന്ദർശിച്ച് ക്ഷണക്കത്ത് കൈമാറുമ്പോൾ അനിരുദ്ധും ഒപ്പമുണ്ടായിരുന്നു. ജൂബിലി ഹിൽസിലെ വസതിയിലെത്തി രേവന്ത് റെഡ്ഡിയെ ക്ഷണിച്ച വിവരം തെലങ്കാന മുഖ്യമന്ത്രിയുടെ ഓഫീസ് എക്‌സിലൂടെ ഔദ്യോഗികമായി അറിയിച്ചു.
രാഷ്ട്രീയ, സിനിമാ, കായിക മേഖലകളിലെ പ്രമുഖർ പങ്കെടുക്കുന്ന വിരുന്നാണ് ചെന്നൈയിൽ ക്രമീകരിച്ചിരിക്കുന്നത്. നവംബർ 11-ന് ഗ്രീസിൽ വെച്ചാണ് വിവാഹച്ചടങ്ങുകൾ നടക്കുകയെന്ന് റിപ്പോർട്ടുകളുണ്ടെങ്കിലും ഇരുവരും ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല.
