ഗ്രേറ്റർ നോയിഡ: ഉത്തർപ്രദേശിലെ ഗ്രേറ്റർ നോയിഡയിലുള്ള ഒരു ഗ്രാമത്തിലെ വീട്ടിൽ ദമ്പതികളെയും അവരുടെ മൂന്ന് മക്കളെയും ശനിയാഴ്ച മരിച്ച നിലയിൽ കണ്ടെത്തി. മഹേഷ് (37), ഭാര്യ ലളിത (35), ഇവരുടെ മക്കളായ ലഡ്ഡു (11), മിഷ്ടി (7), സാക്ഷാത് (3) എന്നിവരാണ് മരിച്ചത്. തലേദിവസം രാത്രി കുടുംബം നൂഡിൽസ് കഴിച്ചിരുന്നതായി പ്രാഥമിക വിവരമുള്ളതിനാൽ ഭക്ഷ്യവിഷബാധയാണ് മരണകാരണമെന്നാണ് പോലീസിന്റെ പ്രാഥമിക നിഗമനം.
മരണവിവരം ശനിയാഴ്ച രാവിലെ അറിഞ്ഞ ഉടൻതന്നെ ഉന്നത ഉദ്യോഗസ്ഥരും ലോക്കൽ പോലീസും ആംബുലൻസും ഭക്ഷ്യസുരക്ഷാ വകുപ്പിലെ ഉദ്യോഗസ്ഥരും സ്ഥലത്തെത്തി. ഫോറൻസിക് സംഘവും ഫീൽഡ് യൂണിറ്റും വീട്ടിലെത്തി ശാസ്ത്രീയ തെളിവുകൾ ശേഖരിച്ച ശേഷം മൃതദേഹങ്ങൾ പോസ്റ്റ്‌മോർട്ടത്തിനായി അയച്ചു.
കുടുംബം തലേന്ന് രാത്രി നൂഡിൽസ് കഴിച്ചിരുന്നതായി മഹേഷിന്റെ മാതാവും അയൽവാസികളും പോലീസിന് മൊഴി നൽകിയിട്ടുണ്ട്. പോസ്റ്റ്‌മോർട്ടം റിപ്പോർട്ടും മറ്റ് ശാസ്ത്രീയ പരിശോധനാ ഫലങ്ങളും പുറത്തുവന്നതിനു ശേഷമേ യഥാർത്ഥ മരണകാരണം വ്യക്തമാകൂ എന്നും അന്വേഷണ റിപ്പോർട്ടിന്റെ അടിസ്ഥാനത്തിൽ തുടർനടപടികൾ സ്വീകരിക്കുമെന്നും പോലീസ് അറിയിച്ചു.
