രാജ്ഗഡ്: മധ്യപ്രദേശിലെ അജ്നാർ നദിയിലേക്ക് ജനങ്ങൾ നേരിട്ട് മാലിന്യം വലിച്ചെറിയുന്നത് തടയാൻ പരിസ്ഥിതി പ്രവർത്തകൻ ബിട്ടു തബാഹി (സുരേന്ദ്ര സിംഗ് ചൗധരി, 20) സ്ഥാപിച്ച വേസ്റ്റ് ബിന്നുകളിൽ ഒന്ന് മോഷണം പോയി. നദിക്കരയിലെ ഒരു മരത്തിന് സമീപം പൊതുജനങ്ങൾക്കായി സ്ഥാപിച്ചിരുന്ന രണ്ട് ബിന്നുകളിൽ ഒന്നാണ് കാണാതായത്.
മാസങ്ങൾ നീണ്ട ശുചീകരണ പ്രവർത്തനങ്ങൾക്ക് ശേഷവും നദി വീണ്ടും മലിനീകരിക്കപ്പെട്ടതിൽ നിരാശ പ്രകടിപ്പിച്ച് കഴിഞ്ഞ ചൊവ്വാഴ്ചയും, തുടർന്ന് വെള്ളിയാഴ്ചയും ബിട്ടു ഇൻസ്റ്റാഗ്രാമിൽ വീഡിയോ പങ്കുവെച്ചിരുന്നു. രാജ്ഗഡ് ജില്ലയിലൂടെ ഒഴുകുന്ന അജ്നാർ നദി രണ്ടാം തവണയും വൃത്തിയാക്കിയ ശേഷമാണ് മാലിന്യങ്ങൾ ശരിയായ രീതിയിൽ നിക്ഷേപിക്കുന്നതിനായി ഇയാൾ ബിന്നുകൾ എത്തിച്ചത്.
സ്വന്തം ആവശ്യത്തിനല്ല, നദി മലിനമാകാതിരിക്കാൻ ജനങ്ങൾക്ക് വേണ്ടിയാണ് ഇത് വെച്ചതെന്നും പൊതുസൗകര്യത്തിനായി വെച്ച ഡ്രമ്മുകളാണ് മോഷ്ടിക്കപ്പെട്ടതെന്നും ബിട്ടു വീഡിയോയിലൂടെയും അടിക്കുറിപ്പിലൂടെയും വ്യക്തമാക്കി. സംഭവത്തിൽ കടുത്ത പ്രതിഷേധവുമായി സോഷ്യൽ മീഡിയ ഉപയോക്താക്കൾ രംഗത്തെത്തി. മാലിന്യം തള്ളുന്നവർക്ക് പിഴ ചുമത്തണമെന്നും, പോലീസിൽ പരാതി നൽകി പ്രദേശം സംരക്ഷിക്കാൻ സുരക്ഷാ ക്രമീകരണങ്ങൾ ഏർപ്പെടുത്തണമെന്നും ആളുകൾ പ്രതികരിച്ചു.
