ചെന്നൈ: ആർഎസ്എസ്, ദ്രാവിഡർ കഴകം തുടങ്ങിയ സംഘടനകളുടെ ഘോഷയാത്രകൾക്ക് തുടർച്ചയായി അനുമതി നിഷേധിക്കുന്ന തമിഴ്നാട് സർക്കാരിന്റെയും പോലീസിന്റെയും നിലപാടിനെതിരെ മദ്രാസ് ഹൈക്കോടതിയുടെ രൂക്ഷവിമർശനം. ഭീകരവാദ ഭീഷണി നിലനിൽക്കുന്ന ജമ്മു കശ്മീരിൽ പോലും ആർഎസ്എസിന് മാർച്ച് നടത്താൻ കഴിയുമ്പോൾ തമിഴ്നാട്ടിൽ മാത്രം എല്ലാ വർഷവും എന്തിനാണ് വിലക്കേർപ്പെടുത്തുന്നതെന്ന് ജസ്റ്റിസ് വി. ലക്ഷ്മിനാരായണന്റെ ബെഞ്ച് ചോദിച്ചു. നേരത്തെ കോടതി നിർദേശങ്ങൾ നൽകിയിട്ടും അനുമതി നിഷേധിക്കുന്നതിലൂടെ അധികാരത്തിൽ വരുന്ന സർക്കാരുകൾ ഏത് ഘോഷയാത്രയ്ക്കും എതിരുനിൽക്കുകയും പൗരന്മാരെ ശത്രുക്കളെപ്പോലെ കാണുകയാണെന്നും കോടതി നിരീക്ഷിച്ചു.
ഒക്ടോബർ 18, 25, നവംബർ 1 തീയതികളിലോ മറ്റ് അനുയോജ്യമായ ദിവസങ്ങളിലോ വിജയദശമി-സ്ഥാപകദിന റൂട്ട് മാർച്ച് നടത്താൻ അനുമതി തേടി ആർഎസ്എസ് അംഗം വി.ജി. ജഗദീശൻ സമർപ്പിച്ച ഹർജിയിലാണ് ഹൈക്കോടതി ഇടപെടൽ. ക്രമസമാധാന പ്രശ്നങ്ങൾ ചൂണ്ടിക്കാട്ടി വിജയ് സർക്കാർ മുൻപും മാർച്ചിന് അനുമതി നിഷേധിച്ചിരുന്നതായും, എല്ലാ വർഷവും സംഘടനയ്ക്ക് അനുമതിക്കായി കോടതിയെ സമീപിക്കേണ്ടിവരുന്നുവെന്നും ഹർജിക്കാരനുവേണ്ടി ഹാജരായ മുതിർന്ന അഭിഭാഷകൻ എൻ.എൽ. രാജ വാദിച്ചു; ആർഎസ്എസിനെപ്പോലെ സാമ്പത്തിക-സംഘടനാ ശേഷിയില്ലാത്ത ചെറുകിട പ്രസ്ഥാനങ്ങളുടെ അവസ്ഥയും അദ്ദേഹം കോടതിയുടെ ശ്രദ്ധയിൽപ്പെടുത്തി.
പൊതുയോഗങ്ങൾക്കായി നിർദേശിച്ച സ്ഥലങ്ങൾ ഔദ്യോഗികമായി നിശ്ചയിച്ചവയല്ലാത്തതിനാലാണ് അനുമതി നൽകാതിരുന്നതെന്ന് സംസ്ഥാന സർക്കാരിനുവേണ്ടി അഡ്വക്കേറ്റ് ജനറൽ വിജയ നാരായൺ വിശദീകരിച്ചു. മാർച്ച് സമാധാനപരമായി നടത്തുന്നതിനുള്ള ക്രമീകരണങ്ങൾ ചർച്ച ചെയ്യാൻ ഹർജിക്കാരുടെ അഞ്ച് പ്രതിനിധികൾ സ്റ്റേറ്റ് പബ്ലിക് പ്രോസിക്യൂട്ടർ ജോൺ സത്യനെ കാണണമെന്ന് നിർദേശിച്ച കോടതി, ഘോഷയാത്ര സംബന്ധിച്ച റിപ്പോർട്ട് സമർപ്പിക്കാൻ സർക്കാരിനോട് ആവശ്യപ്പെട്ട് ഹർജി വ്യാഴാഴ്ചത്തേക്ക് മാറ്റി.
