ന്യൂഡൽഹി: വോട്ടർപട്ടികയിലെ ക്രമക്കേടുകൾക്കെതിരെ സമരം ചെയ്ത യൂത്ത് കോൺഗ്രസ് പ്രവർത്തകർക്ക് നേരെയുണ്ടായ പോലീസ് അതിക്രമത്തിൽ മലയാളി വിദ്യാർത്ഥിനിയുടെ ഒരു ചെവിയുടെ കേൾവിശക്തി നഷ്ടപ്പെട്ടതായി ലോക്സഭാ പ്രതിപക്ഷ നേതാവ് രാഹുൽ ഗാന്ധി. ചൊവ്വാഴ്ച നടന്ന പ്രതിഷേധത്തിനിടെ കസ്റ്റഡിയിലെടുത്ത ഡൽഹി സർവകലാശാലയിലെ വിദ്യാർത്ഥിനിയായ ആതിരയെ പോലീസ് ബസിനുള്ളിൽ വെച്ച് ഉദ്യോഗസ്ഥർ ക്രൂരമായി മർദിക്കുകയായിരുന്നുവെന്ന് രാഹുൽ ഗാന്ധിക്കൊപ്പം വാർത്താസമ്മേളനത്തിൽ പങ്കെടുത്ത പ്രവർത്തകർ വ്യക്തമാക്കി.
വനിതാ പോലീസുകാരുടെ സാന്നിധ്യമില്ലാതെ പെൺകുട്ടികളെ കസ്റ്റഡിയിലെടുത്തത് ചോദ്യം ചെയ്തതിനാണ് കൊണാട്ട് പ്ലേസ് പോലീസ് സ്റ്റേഷന് മുന്നിൽ വെച്ച് ഉദ്യോഗസ്ഥർ തന്റെ കരണത്തടിച്ചതെന്നും, ഇതേത്തുടർന്ന് കണ്ണിനും ചെവിക്കും ഗുരുതര പരിക്കേറ്റതായും ആതിര പറഞ്ഞു. ഇതിനുപുറമെ, ചഞ്ചൽ യാദവ് എന്ന വനിതാ കോൺസ്റ്റബിൾ തന്റെ കഴുത്തിന് പിടിച്ച് സീറ്റിലേക്ക് തള്ളിയിടുകയും മുഖത്തും ചെവിക്ക് സമീപവും മാന്തിപ്പറിക്കുകയും അടിച്ചതായും വാർത്താസമ്മേളനത്തിൽ പങ്കെടുത്ത എൻഎസ്‌യുഐ വനിതാ പ്രവർത്തകയും ആരോപിച്ചു. കസ്റ്റഡിയിലെടുത്ത യുവാക്കളെ ലാത്തി കൊണ്ട് മർദിക്കുകയും സ്വകാര്യഭാഗങ്ങളിൽ ചവിട്ടുകയും ചെയ്തതായും, പ്രായപൂർത്തിയാകാത്തവരെ ഫോണോ പണമോ ഇല്ലാതെ വഴിയിൽ ഉപേക്ഷിച്ചതായും കോൺഗ്രസ് പ്രവർത്തകർ പരാതിപ്പെട്ടു.
പോലീസിന്റെ അക്രമങ്ങൾ വീഡിയോയിൽ പകർത്തി കോൺഗ്രസിന് അയച്ചുനൽകാൻ ആവശ്യപ്പെട്ട രാഹുൽ ഗാന്ധി, ഈ തെളിവുകൾ ഉപയോഗിച്ച് കോൺസ്റ്റബിൾമാർ മുതൽ പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, ഗ്യാനേഷ് കുമാർ എന്നിവരുൾപ്പെടെയുള്ള ഭരണകൂട നേതൃത്വത്തിന് തക്കതായ ശിക്ഷ ഉറപ്പുവരുത്തുമെന്നും രാജ്യത്തിന്റെ ശബ്ദത്തിനെതിരെ നിൽക്കാൻ ആർക്കും കഴിയില്ലെന്നും മുന്നറിയിപ്പ് നൽകി.
