ലുധിയാന: പഞ്ചാബിലെ ലുധിയാന ഈസ്റ്റ് നിയമസഭാ മണ്ഡലത്തിലെ വോട്ടർ പട്ടികയിൽ സ്വാതന്ത്ര്യസമര സേനാനി ഭഗത് സിംഗിന്റെ ഫോട്ടോ ഉൾപ്പെട്ട സംഭവം വിവാദമായതോടെ വിശദീകരണവുമായി അധികൃതർ. പാർട്ട് 38-ൽ സീരിയൽ നമ്പർ 422-ലെ അമൻ കുമാർ എന്ന വോട്ടറുടെ പേരിനൊപ്പമാണ് ഭഗത് സിംഗിനോട് സാദൃശ്യമുള്ള ചിത്രം ചേർക്കപ്പെട്ടിരുന്നത്; എന്നാൽ ഈ പിഴവ് നേരത്തെ തന്നെ ശ്രദ്ധയിൽപ്പെട്ടിരുന്നുവെന്നും നിലവിൽ പരിഹരിച്ചതായും തിരഞ്ഞെടുപ്പ് വിഭാഗം വ്യക്തമാക്കി.
കഴിഞ്ഞ ഓഗസ്റ്റ് 13-ന് പ്രസിദ്ധീകരിച്ച കരട് വോട്ടർ പട്ടികയിലാണ് ഈ തെറ്റായ ചിത്രം ഉൾപ്പെട്ടിരുന്നതെന്നും തുടർന്ന് എസ്ഐആറിലൂടെ അത് തിരുത്തിയെന്നും ലുധിയാന ജില്ലാ ഇലക്ടറൽ ഓഫീസർ വ്യക്തമാക്കി. ശരിയായ ഫോട്ടോകൾ ഉൾപ്പെടുത്തിക്കൊണ്ടുള്ള അന്തിമ വോട്ടർ പട്ടികയാണ് ഇപ്പോൾ തയ്യാറാക്കിയിരിക്കുന്നതെന്നും അദ്ദേഹം അറിയിച്ചു.
വോട്ടർ പട്ടികയുടെ ഭാഗം പുറത്തുവിട്ടുകൊണ്ട് കോൺഗ്രസ് നേതാവ് അമരീന്ദർ സിങ് രാജാ വാറിങ് രൂക്ഷമായ വിമർശനമാണ് ഉന്നയിച്ചത്. പഞ്ചാബിലെ വോട്ടർ പട്ടികയിൽ ഗുരുതരമായ പാളിച്ചകളുണ്ടെന്ന് ചൂണ്ടിക്കാട്ടിയ അദ്ദേഹം, ഇനി കാണാൻ ഇതു മാത്രമേ ബാക്കിയുണ്ടായിരുന്നുള്ളൂ എന്ന അടിക്കുറിപ്പോടെയാണ് ചിത്രം പങ്കുവെച്ചത്. എസ്ഐആറുമായി ബന്ധപ്പെട്ട് ഡൽഹിയിൽ പ്രതിപക്ഷ പാർട്ടികളും സിജെപിയും പ്രക്ഷോഭം ശക്തമാക്കുന്നതിനിടെയാണ് ഈ സംഭവം പുറത്തുവന്നത്.
