ന്യൂഡൽഹി: ഔദ്യോഗിക സമരവേദി എന്ന പദവിയിൽ നിന്ന് ജന്തർ മന്തറിനെ ഒഴിവാക്കിയ കേന്ദ്ര സർക്കാർ നടപടിയെ ഒരു കാരണവശാലും അംഗീകരിക്കില്ലെന്നും നരേന്ദ്ര മോദിക്ക് ജന്തർ മന്തറിനെ എന്തിനാണ് ഇത്ര പേടിയെന്നും സിജെപി കൺവീനർ സൗരവ് ദാസ്. സമാധാനപരമായി ഒത്തുകൂടാനും പ്രതിഷേധിക്കാനുമുള്ള ജനങ്ങളുടെ മൗലികാവകാശത്തിന്മേലുള്ള നേരിട്ടുള്ള കടന്നുകയറ്റമാണിതെന്നും അദ്ദേഹം പ്രസ്താവനയിലൂടെ പ്രതികരിച്ചു.
ജന്തർ മന്തർ രാജ്യത്തെ ജനങ്ങളുടേതാണെന്നും ഈ തീരുമാനമെടുക്കും മുൻപ് കേന്ദ്ര ആഭ്യന്തര മന്ത്രാലയം ജനങ്ങളോടോ മറ്റ് സംഘടനകളോടോ ബന്ധപ്പെട്ടവരോടോ ഏതെങ്കിലും തരത്തിലുള്ള കൂടിയാലോചനകൾ നടത്തിയിട്ടുണ്ടോയെന്നും അദ്ദേഹം ചോദിച്ചു. ജനങ്ങളുടെ ജന്തർ മന്തർ റദ്ദാക്കിയതുപോലെ അധികം വൈകാതെ തന്നെ പ്രധാനമന്ത്രി രാജ്യത്തെ ജനാധിപത്യത്തെയും ഇല്ലാതാക്കുമെന്നും അതിന്റെ ആദ്യപടിയാണ് ഈ നടപടിയെന്നും സൗരവ് ദാസ് ചൂണ്ടിക്കാട്ടി.
ഏകപക്ഷീയമായ ഇത്തരം ഉത്തരവുകൾ തള്ളിക്കളയുകയാണെന്നും ഇപ്പോൾ രാജ്യം മുഴുവൻ ജന്തർ മന്തറായി മാറിക്കൊണ്ടിരിക്കുകയാണെന്നും സിജെപി കൺവീനർ വ്യക്തമാക്കി.
