ചെന്നൈ: തമിഴ്നാടിന്റെ വിവിധ വികസന ആവശ്യങ്ങൾ ഔദ്യോഗിക സന്ദർശനത്തിനെത്തിയ പ്രധാനമന്ത്രി നരേന്ദ്ര മോദിക്ക് മുന്നിൽ ഉന്നയിച്ച് മുഖ്യമന്ത്രി സി. ജോസഫ് വിജയ്. എസ്എസ്എ പദ്ധതിക്കായി കേന്ദ്രം തടഞ്ഞുവെച്ച 5,110 കോടി രൂപ ഉടൻ വിട്ടുനൽകണമെന്നും സംസ്ഥാനത്തിന് അതിവേഗ റെയിൽപ്പാത അനുവദിക്കണമെന്നും അദ്ദേഹം ആവശ്യപ്പെട്ടു. വിവിധ റെയിൽവേ ലൈനുകൾ ഇരട്ടിപ്പിക്കൽ, ദേശീയപാത ആറുവരിപ്പാതയാക്കൽ എന്നിവയ്ക്കും അദ്ദേഹം മുൻഗണന തേടി.
ചെന്നൈ മെട്രോ മൂന്നാം ഘട്ടത്തിനുള്ള ദ്രുതാനുമതിക്ക് പുറമെ കോയമ്പത്തൂർ-മധുരൈ മെട്രോ പദ്ധതികൾ, ഹൊസൂർ-ബൊമ്മനസാന്ദ്ര ലൈൻ, ചെന്നൈ-കന്യാകുമാരി, ചെന്നൈ-കോയമ്പത്തൂർ പാതകൾ എന്നിവയുടെ വികസനവും വിജയ് മുന്നോട്ടുവെച്ചു.
ഗോദാവരി-കാവേരി നദീസംയോജനം ദേശീയ മുൻഗണനയോടെ നടപ്പിലാക്കണമെന്നും മദ്രാസ് ഹൈക്കോടതിയിലെ പ്രാഥമിക ഭാഷയായി തമിഴിനെ പ്രഖ്യാപിക്കണമെന്നും മുഖ്യമന്ത്രി പ്രധാനമന്ത്രിയോട് ആവശ്യപ്പെട്ടു.
