ന്യൂഡൽഹി: അതിർത്തികളിൽ കാവൽ നിൽക്കേണ്ട സേനകളെ ഡൽഹിയിലെത്തിച്ച കേന്ദ്ര സർക്കാരിന്റെ പ്രധാന ശത്രുക്കൾ പാകിസ്താനോ ചൈനയോ അല്ലെന്നും തെരുവിൽ സമരം ചെയ്യുന്ന കുട്ടികളും യുവാക്കളുമാണെന്നും ജോൺ ബ്രിട്ടാസ് എംപി. ഡൽഹി പോലീസ് ഉദ്യോഗസ്ഥർക്ക് ഭ്രാന്ത് പിടിച്ച അവസ്ഥയാണെന്നും താൻ സമരത്തിൽ പങ്കെടുക്കുകയല്ല, മറിച്ച് മാധ്യമങ്ങളോട് സംസാരിക്കവെയാണ് പോലീസ് ബലമായി കസ്റ്റഡിയിലെടുത്തതെന്നും അദ്ദേഹം വ്യക്തമാക്കി. എംപിയായ തനിക്ക് തെരുവിൽ നിന്ന് മാധ്യമങ്ങളോട് സംസാരിക്കാൻ പോലും അനുവാദമില്ലെങ്കിൽ പിന്നെ എന്തിനാണ് ജനപ്രതിനിധിയായി തുടരുന്നതെന്നും അദ്ദേഹം ചോദിച്ചു.
ഇന്ത്യൻ ജനാധിപത്യം ജീവവായുവാണെന്നും രാഷ്ട്രീയ വ്യത്യാസങ്ങൾ മാറ്റിവെച്ചുള്ള പോരാട്ടത്തിൽ ഇന്ത്യാ ബ്ലോക്കിലെ മുഴുവൻ എംപിമാരും നേതാക്കളും ഡൽഹിയിലെ പ്രക്ഷോഭത്തിൽ അണിനിരക്കുമെന്നും ബ്രിട്ടാസ് പറഞ്ഞു. ജനാധിപത്യ ചരിത്രത്തിലെ ഏറ്റവും നിർണ്ണായക ദിനമാണിതെന്നും ശാരീരിക അസ്വസ്ഥതകളൊന്നും സമരവീര്യത്തെ പിന്നോട്ടടിക്കില്ലെന്നും അദ്ദേഹം വ്യക്തമാക്കി.
തെരുവിൽ ജനാധിപത്യം ആക്രമിക്കപ്പെടുമ്പോൾ വിളിപ്പാടകലെയുള്ള സുപ്രീം കോടതി എന്തുകൊണ്ടാണ് വിഷയത്തിൽ ഇടപെടാത്തതെന്നും ജനാധിപത്യത്തെ മോചിപ്പിക്കാൻ കോടതിക്ക് ഉത്തരവാദിത്തമില്ലേ എന്നും അദ്ദേഹം ആരാഞ്ഞു. ഗ്യാനേഷ് കുമാർ ഒരിക്കലും ജനങ്ങളേക്കാൾ വലിയ ആളാകില്ലെന്ന് വ്യക്തമാക്കിയ ബ്രിട്ടാസ്, നിഷ്പക്ഷത പാലിച്ച് നിശബ്ദരായിരിക്കുന്നവരുടെ ആഡംബരം അധികനാൾ നിലനിൽക്കില്ലെന്നും മുന്നറിയിപ്പ് നൽകി.
