ന്യൂഡൽഹി: പ്രതിപക്ഷം ഉന്നയിച്ച 'വോട്ട് ചോരി' ആരോപണങ്ങളെ രാഷ്ട്രപതി പിന്തുണച്ചുവെന്ന ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ പ്രസ്താവന പൂർണ്ണമായും കളവാണെന്ന് കേന്ദ്ര സർക്കാർ വൃത്തങ്ങൾ. വാർത്താ ഏജൻസിയായ പിടിഐ (PTI) ആണ് സർക്കാർ വൃത്തങ്ങളെ ഉദ്ധരിച്ച് ഈ വിവരം റിപ്പോർട്ട് ചെയ്തത്.
രാഷ്ട്രപതിയുമായുള്ള കൂടിക്കാഴ്ചയ്ക്ക് പിന്നാലെ മാധ്യമങ്ങളെ കണ്ട രാഹുൽ ഗാന്ധി, വിഷയത്തിൽ രാഷ്ട്രപതിയുടെ നിലപാട് അത്ഭുതപ്പെടുത്തുന്നതും അവിശ്വസനീയവുമായിരുന്നുവെന്ന് അവകാശപ്പെട്ടിരുന്നു.
തങ്ങൾ ചൂണ്ടിക്കാണിച്ച തെരഞ്ഞെടുപ്പ് ക്രമക്കേടുകളെക്കുറിച്ചുള്ള പരാതികളോ വാദങ്ങളോ രാഷ്ട്രപതി തള്ളിക്കളഞ്ഞില്ലെന്നും കാര്യങ്ങളെല്ലാം അനുഭാവപൂർവ്വം കേട്ടെന്നുമായിരുന്നു രാഹുൽ ഗാന്ധിയുടെ പ്രതികരണം.
