ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് രാഷ്ട്രപതി ദ്രൗപദി മുർമുവിന് നിവേദനം നൽകിയതിന് പിന്നാലെ പ്രതികരണവുമായി കോൺഗ്രസ് നേതാവ് രാഹുൽ ഗാന്ധി എംപി. വിഷയം പരിശോധിക്കാമെന്ന രാഷ്ട്രപതിയുടെ ഉറപ്പിനെ ഇന്ത്യാ സഖ്യം സ്വാഗതം ചെയ്യുന്നുവെന്നും, കൂടിക്കാഴ്ചയ്ക്കിടെ വോട്ട് കൊള്ളയെ സംബന്ധിച്ച കാര്യങ്ങൾ രാഷ്ട്രപതി തള്ളിക്കളഞ്ഞില്ല എന്നത് തന്നെ അത്ഭുതപ്പെടുത്തിയെന്നും അദ്ദേഹം സമൂഹമാധ്യമങ്ങളിൽ കുറിച്ചു.
പ്രധാനമന്ത്രി നരേന്ദ്ര മോദിയും അമിത് ഷായും ചേർന്ന് രാജ്യത്തെ തെരഞ്ഞെടുപ്പ് സമ്പ്രദായം അട്ടിമറിച്ചതിനെക്കുറിച്ചും ഗ്യാനേഷ് കുമാറിന്റെ രാജി അനിവാര്യമായതിനെക്കുറിച്ചും വ്യക്തമാക്കിക്കൊണ്ടാണ് പ്രതിപക്ഷ പ്രതിനിധി സംഘം നിവേദനം കൈമാറിയത്. വോട്ട് കൊള്ള സംബന്ധിച്ച തെളിവുകൾ ഹാജരാക്കാൻ രാഷ്ട്രപതി ആവശ്യപ്പെട്ടിട്ടുണ്ടെന്ന് രാഹുൽ ഗാന്ധി പറഞ്ഞു.
ആവശ്യപ്പെട്ട മുഴുവൻ രേഖകളും തെളിവുകളും ഇന്ത്യാ സഖ്യം രാഷ്ട്രപതിക്ക് മുന്നിൽ സമർപ്പിക്കുമെന്നും, വിഷയം വിശദമായി പരിശോധിക്കാമെന്ന രാഷ്ട്രപതിയുടെ നിലപാട് സ്വാഗതാർഹമാണെന്നും അദ്ദേഹം വ്യക്തമാക്കി.
