ഇന്ത്യയിൽ മൂന്ന് കമ്പനികൾക്ക് സാറ്റലൈറ്റ് കമ്മ്യൂണിക്കേഷൻ (സാറ്റ്കോം) ലൈസൻസുകൾ അനുവദിച്ചിട്ടുണ്ടെന്നും, നിശ്ചിത സുരക്ഷാ നിബന്ധനകൾ പാലിക്കുകയും സ്പെക്ട്രം നിരക്കുകൾ സംബന്ധിച്ച സംവിധാനം കേന്ദ്രം അന്തിമമാക്കുകയും ചെയ്യുന്ന മുറയ്ക്ക് ഇവയ്ക്ക് പ്രവർത്തനം ആരംഭിക്കാമെന്നും കേന്ദ്ര വാർത്താവിനിമയ മന്ത്രി ജ്യോതിരാദിത്യ സിന്ധ്യ. രാജ്യത്ത് സാറ്റ്കോം സേവനങ്ങൾ ആരംഭിക്കുന്നത് സംബന്ധിച്ച് കോൺഗ്രസ് നേതാവ് രാഹുൽ ഗാന്ധിയും ഇലോൺ മസ്കും തമ്മിൽ എക്സിൽ (ട്വിറ്റർ) നടന്ന വാക്പോരിന്റെ പശ്ചാത്തലത്തിലാണ് കേന്ദ്രമന്ത്രിയുടെ പ്രതികരണം.
ഒരു മേഖലയിലും കുത്തക അനുവദിക്കില്ലെന്നതാണ് ഇന്ത്യയുടെ നിലപാടെന്നും, മത്സരശേഷിയുള്ള വിപണിയിലൂടെ അനുയോജ്യമായ സേവനം തിരഞ്ഞെടുക്കാൻ ഉപഭോക്താക്കൾക്ക് സൗകര്യമൊരുക്കുകയാണ് സർക്കാരിന്റെ ചുമതലയെന്നും സിന്ധ്യ വ്യക്തമാക്കി. ഒരു നിർദ്ദിഷ്ട കമ്പനിയെക്കുറിച്ച് മാത്രമാണ് നിലവിൽ വലിയ ചർച്ചകൾ നടക്കുന്നതെങ്കിലും ആകെ മൂന്ന് കമ്പനികൾക്ക് അനുമതി ലഭിച്ചിട്ടുണ്ടെന്ന് അദ്ദേഹം ചൂണ്ടിക്കാട്ടി.
റവന്യൂ അടിസ്ഥാനമാക്കിയുള്ള ചാർജ്ജ് വ്യവസ്ഥ സർക്കാർ തീരുമാനിക്കുന്നതോടെ സ്പെക്ട്രം അനുവദിക്കുമെന്നും, വ്യക്തിഗത സുരക്ഷാ മാനദണ്ഡങ്ങൾ പൂർത്തിയാക്കുന്നതിനനുസരിച്ച് കമ്പനികൾക്ക് സർവീസുകൾ തുടങ്ങാനാകുമെന്നും അദ്ദേഹം കൂട്ടിച്ചേർത്തു.
