ന്യൂഡൽഹി: ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിലുള്ള ഇന്ത്യ സഖ്യത്തിലെ പത്ത് എംപിമാർക്ക് രാഷ്ട്രപതി കൂടിക്കാഴ്ചയ്ക്ക് സമയം അനുവദിച്ചു. രാത്രി എട്ട് മണിക്കാണ് കൂടിക്കാഴ്ച നിശ്ചയിച്ചിരിക്കുന്നത്. മുൻ മുഖ്യമന്ത്രി മമതാ ബാനർജിയും സംഘത്തിലുണ്ടാകുമെന്ന് സൂചിപ്പിച്ചുകൊണ്ട് തൃണമൂൽ കോൺഗ്രസ് നേതാവ് കുനാൽ ഘോഷാണ് ഇക്കാര്യം എക്സിലൂടെ വ്യക്തമാക്കിയത്.
ദിവസം മുഴുവൻ നീട്ടിക്കൊണ്ടുപോയ ശേഷം രാത്രി എട്ടു മണിക്ക് സന്ദർശനാനുമതി നൽകിയത് പ്രതിഷേധത്തിന്റെ ജനശ്രദ്ധ കുറയ്ക്കാനാണോയെന്ന് കുനാൽ ഘോഷ് വിമർശിച്ചു. നിങ്ങൾ ചെയ്യുന്നത് വലിയ അബദ്ധമാണെന്നും രാജ്യം മുഴുവൻ ഈ നീക്കങ്ങൾ ഉറ്റുനോക്കുകയാണെന്നും അദ്ദേഹം കുറ്റപ്പെടുത്തി.
ഇതിനിടെ കൊൽക്കത്ത-ഡൽഹി രാജധാനി എക്സ്പ്രസ് റദ്ദാക്കിയതായും, ചില ട്രെയിനുകൾ സർവീസ് വൈകുന്നതായും പരാതികൾ ഉയർന്നിട്ടുണ്ടെന്ന് അദ്ദേഹം ചൂണ്ടിക്കാട്ടി. ഡൽഹിയിലെ മെട്രോ സ്റ്റേഷൻ പ്രവേശന കവാടങ്ങൾ അടച്ചിട്ടിരിക്കുന്ന വിവരങ്ങളും പുറത്തുവരുന്നുണ്ടെന്നും, ഇത് ഭരണകൂടത്തിന്റെ ഭയം കൊണ്ടാണോയെന്നും കുനാൽ ഘോഷ് ചോദിച്ചു.
