ന്യൂഡൽഹി: തനിക്കെതിരെ ചുമത്തപ്പെടുന്ന ഓരോ എഫ്ഐആറും മെഡലുകളാണെന്നും നിലവിൽ 45 കേസുകൾ ഉണ്ടെന്നും അത് 100 തികയ്ക്കുകയാണ് ലക്ഷ്യമെന്നും രാഹുൽ ഗാന്ധി. വോട്ടർപട്ടിക പരിഷ്കരണത്തിലെ തിരിമറികളും "വോട്ടുചോർച്ച" ആരോപണങ്ങളും മുൻനിർത്തി മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനും കമ്മീഷനുമെതിരായ പ്രക്ഷോഭം പ്രതിപക്ഷ പാർട്ടികൾ കൂടുതൽ ശക്തമാക്കുന്നതിനിടെയാണ് അദ്ദേഹത്തിന്റെ പ്രതികരണം.
പാർലമെന്റിൽ നിന്ന് തെരഞ്ഞെടുപ്പ് കമ്മീഷൻ ആസ്ഥാനത്തേക്ക് മാർച്ച് നടത്തുകയും കമ്മീഷനുമായി കൂടിക്കാഴ്ച ആവശ്യപ്പെട്ട് സമീപത്ത് മണിക്കൂറുകളോളം കുത്തിയിരുന്ന് സമരം നടത്തുകയും ചെയ്ത രാഹുൽ ഗാന്ധി, പ്രിയങ്ക ഗാന്ധി വാദ്ര, മറ്റ് 'ഇന്ത്യ' മുന്നണി നേതാക്കൾ എന്നിവരെ പോലീസ് കസ്റ്റഡിയിലെടുത്തതിന് തൊട്ടടുത്ത ദിവസമാണ് പുതിയ ഘട്ട സമരങ്ങൾ ആരംഭിച്ചത്.
ബുധനാഴ്ച ഉച്ചയ്ക്ക് ഒരു മണിക്ക് കശ്മീരി ഗേറ്റിലെ ഡൽഹി ചീഫ് ഇലക്ടറൽ ഓഫീസറുടെ (സിഇഒ) ഓഫീസിന് മുന്നിൽ ആം ആദ്മി പാർട്ടി, കോൺഗ്രസ്, ഇടതുകക്ഷികൾ എന്നിവരടങ്ങുന്ന സംയുക്ത പ്രതിപക്ഷ സംഘടനകൾ വൻ പ്രതിഷേധ ധർണ്ണ സംഘടിപ്പിക്കും. പാർട്ടി പ്രവർത്തകരും അനുഭാവികളും വലിയ തോതിൽ പ്രതിഷേധത്തിൽ അണിനിരക്കണമെന്ന് ആം ആദ്മി പാർട്ടി ഡൽഹി അധ്യക്ഷൻ സൗരഭ് ഭരദ്വാജ് ആഹ്വാനം ചെയ്തു.
