ന്യൂഡൽഹി: വോട്ട് മോഷണത്തിലൂടെ പ്രധാനമന്ത്രി നരേന്ദ്ര മോദി രാജ്യത്തെ ഹൈജാക്ക് ചെയ്തിരിക്കുകയാണെന്നും ഇതിന് കൂട്ടുനിന്ന ആരെയും രക്ഷപ്പെടാൻ അനുവദിക്കില്ലെന്നും ലോക്സഭാ പ്രതിപക്ഷ നേതാവ് രാഹുൽ ഗാന്ധി. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് 'ഇന്ത്യ' സഖ്യ എംപിമാർ നടത്തുന്ന പ്രക്ഷോഭം ശക്തമായി തുടരുമെന്നും തങ്ങൾ രാജ്യത്തിന്റെ ശബ്ദമാണ് ഉയർത്തുന്നതെന്നും അദ്ദേഹം വ്യക്തമാക്കി.
ഗ്യാനേഷ് കുമാറിനെ മറയാക്കി മോദിയും അമിത് ഷായും ചേർന്ന് തെരഞ്ഞെടുപ്പ് പ്രക്രിയയെ അട്ടിമറിച്ചെന്ന് രാഹുൽ ഗാന്ധി ആരോപിച്ചു. ജനാധിപത്യത്തിൽ തെരഞ്ഞെടുപ്പുകൾ തികച്ചും സുതാര്യമായിരിക്കണം. തങ്ങളെ കാണാൻ തയ്യാറാകാത്ത കമ്മീഷണർ ഭയത്തിലാണ് കഴിയുന്നതെന്നും അദ്ദേഹം വിമർശിച്ചു.
പ്രതിഷേധിച്ച മുന്നൂറോളം എംപിമാരെ പോലീസ് തടഞ്ഞ നടപടിയെ രാഹുൽ ചോദ്യം ചെയ്തു. എന്തിനാണ് എംപിമാരെ തടയുന്നതെന്നും ഇതാണോ യഥാർത്ഥ ജനാധിപത്യമെന്നും ചോദിച്ച അദ്ദേഹം, അട്ടിമറിക്ക് നേതൃത്വം നൽകിയ ഓരോരുത്തരെയും നിയമത്തിന് മുന്നിൽ കൊണ്ടുവരുമെന്നും ആരെയും വെറുതെ വിടില്ലെന്നും കൂട്ടിച്ചേർത്തു.
