ഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് രാജ്യവ്യാപക പ്രക്ഷോഭത്തിന് തുടക്കമിടാൻ കോൺഗ്രസ് തീരുമാനം. ശനിയാഴ്ച മുതൽ 'വോട്ട് ബച്ചാവോ ദേശ് ബച്ചാവോ' എന്ന പേരിൽ ക്യാമ്പയിൻ ആരംഭിക്കുമെന്നും നവംബർ ഒന്നിന് ഡൽഹി രാംലീല മൈതാനത്ത് വൻ മഹാറാലി സംഘടിപ്പിക്കുമെന്നും പാർട്ടി നേതൃത്വം അറിയിച്ചു. ഗ്യാനേഷ് കുമാർ സ്ഥാനമൊഴിയുന്നതുവരെ പ്രതിഷേധ പരിപാടികളുമായി മുന്നോട്ടുപോകാനും വിഷയം ധീരമായി ജനങ്ങൾക്ക് മുൻപിൽ ഉന്നയിക്കാനും ലോക്‌സഭാ പ്രതിപക്ഷ നേതാവ് രാഹുൽ ഗാന്ധി എല്ലാ സംസ്ഥാന ഘടകങ്ങൾക്കും നിർദ്ദേശം നൽകി.
ഗ്യാനേഷ് കുമാറിനെതിരെയുള്ള മൂന്ന് വിജിലൻസ് കേസുകളിലും തുടർ അന്വേഷണം ഉണ്ടാകുമെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ എംപി സൂചന നൽകി. കോൺഗ്രസ് ഹൈക്കമാൻഡിന്റെ കൃത്യമായ നിർദ്ദേശപ്രകാരമാണ് വിജിലൻസ് കേസുകളിലെ തുടർനടപടികൾ പുരോഗമിക്കുന്നതെന്നും അദ്ദേഹം വ്യക്തമാക്കി.
