ന്യൂഡൽഹി: വോട്ടർപട്ടിക പുതുക്കലുമായി ബന്ധപ്പെട്ട ഫോം 6-ൽ ഉൾപ്പെടുത്തിയ ഡിക്ലറേഷൻ കോടതി ശരിവെച്ചതാണെന്ന ന്യായീകരണവുമായി കേന്ദ്ര തെരഞ്ഞെടുപ്പ് കമ്മീഷൻ രംഗത്ത്. ഫോം 6-ലെ മാറ്റങ്ങൾ കോടതി അംഗീകരിച്ചിട്ടില്ലെന്ന ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയുടെ എക്സ് പോസ്റ്റിന് മറുപടിയായി ഇറക്കിയ ഫാക്ട് ചെക്കിലാണ് കമ്മീഷൻ ഈ നിലപാട് വ്യക്തമാക്കിയത്. രാഹുലിന്റെ വാദങ്ങൾ തെറ്റിദ്ധരിപ്പിക്കുന്നതാണെന്നും, കമ്മീഷൻ ഏകകണ്ഠമായി പുറപ്പെടുവിച്ച 2025 ജൂൺ 24-ലെ ബിഹാർ എസ്ഐആർ ഉത്തരവിന്റെ സാധുത 2026 മേയ് 27-ലെ വിധിയിലൂടെ സുപ്രീംകോടതി ശരിവെച്ചിട്ടുണ്ടെന്നും തെരഞ്ഞെടുപ്പ് കമ്മീഷൻ വാദിക്കുന്നു.

എന്നാൽ, ഫോം 6-ൽ വരുത്തിയ കൂട്ടിച്ചേർക്കലുകൾക്ക് തങ്ങൾ അംഗീകാരം നൽകിയിട്ടില്ലെന്ന് ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ സുപ്രീംകോടതി ബെഞ്ച് ഇന്ന് രാവിലെ അസന്ദിഗ്ദ്ധമായി വ്യക്തമാക്കി. തെരഞ്ഞെടുപ്പ് കമ്മീഷന്റെ വാദങ്ങൾ പൂർണ്ണമായും തള്ളിക്കളഞ്ഞുകൊണ്ടാണ് വിവിധ സംസ്ഥാനങ്ങളിലെ വോട്ടർപട്ടിക പുതുക്കലിൽ ഉപയോഗിക്കുന്ന ഫോം 6 സംബന്ധിച്ച നിലപാട് പരമോന്നത കോടതി വ്യക്തമാക്കിയത്.