ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ജന്തർ മന്തറിൽ നടന്ന സമരത്തിനിടെ മാധ്യമപ്രവർത്തകയോട് ലൈംഗികാതിക്രമം കാട്ടിയെന്ന പരാതി നേരിടുന്ന ഡൽഹി പോലീസ് എസിപി വിവേക് ഭഗതിന് അഡീഷണൽ ഡെപ്യൂട്ടി കമ്മീഷണർ ഓഫ് പോലീസ് (അഡീഷണൽ ഡിസിപി) പദവിയിലേക്ക് സ്ഥാനക്കയറ്റം. ഇയാൾക്കൊപ്പം മറ്റ് 11 പോലീസ് ഉദ്യോഗസ്ഥർക്കും പുതിയ പദവി നൽകിയിട്ടുണ്ടെന്നും ഇത് മുൻകൂട്ടി തീരുമാനിച്ച നടപടിക്രമങ്ങൾ മാത്രമാണെന്നുമാണ് മുതിർന്ന പോലീസ് ഉദ്യോഗസ്ഥരുടെ വിശദീകരണം.
ശനിയാഴ്ചത്തെ പ്രതിഷേധത്തിൽ പങ്കെടുത്തവരെ കസ്റ്റഡിയിലെടുക്കുമ്പോൾ വനിതാ പോലീസുകാരുടെ സാന്നിധ്യമില്ലാതിരുന്നത് ചോദ്യം ചെയ്ത മാധ്യമപ്രവർത്തകയെ എസിപി വിവേക് ഭഗത് പിന്നിലേക്ക് തള്ളുകയും ലൈംഗികമായി അതിക്രമിക്കുകയും ചെയ്തുവെന്നാണ് ഉയർന്ന പരാതി. സംഭവവുമായി ബന്ധപ്പെട്ട് മൂന്ന് വനിതാ മാധ്യമപ്രവർത്തകർ നൽകിയ പരാതികൾ വിശദമായ അന്വേഷണത്തിനായി ക്രൈംബ്രാഞ്ചിന് കൈമാറിയതായി ഡൽഹി പോലീസ് ഞായറാഴ്ച വ്യക്തമാക്കിയിരുന്നു.
കുറ്റക്കാരായ പോലീസ് ഉദ്യോഗസ്ഥർക്കെതിരെ എഫ്ഐആർ രജിസ്റ്റർ ചെയ്യണമെന്ന് ആവശ്യപ്പെട്ട് സ്വതന്ത്ര മാധ്യമപ്രവർത്തകരും സോഷ്യൽ മീഡിയ ഇൻഫ്ലുവൻസർമാരും ശനിയാഴ്ച വൈകിട്ട് പാർലമെന്റ് സ്ട്രീറ്റ് പോലീസ് സ്റ്റേഷൻ വളഞ്ഞ് സമരം നടത്തിയിരുന്നു. വിഷയത്തിൽ പ്രതിപക്ഷ നേതാവ് രാഹുൽ ഗാന്ധിയും പ്രിയങ്ക ഗാന്ധി എംപിയും ശക്തമായ പ്രതിഷേധവുമായി രംഗത്തെത്തിയിട്ടുണ്ട്.
