ന്യൂഡൽഹി: മുഖ്യമന്ത്രി വി.ഡി. സതീശനെതിരായ യുഡിഎഫ് കൺവീനർ അടൂർ പ്രകാശിന്റെ വിമർശനങ്ങൾ വ്യക്തിപരമായ അഭിപ്രായം മാത്രമാണെന്നും സതീശൻ സർക്കാരിന്റെ ഭരണം മികച്ച രീതിയിലാണ് മുന്നോട്ടുപോകുന്നതെന്നും എഐസിസി ജനറൽ സെക്രട്ടറി ദീപാ ദാസ്മുൻഷി വ്യക്തമാക്കി. കോൺഗ്രസിനുള്ളിൽ യാതൊരു പ്രശ്നങ്ങളുമില്ലെന്നും പുതിയ പദ്ധതികളുമായി മുന്നേറുന്ന യുഡിഎഫിന്റെ യോഗം രണ്ടു ദിവസത്തിനകം വിളിച്ചുചേർക്കുമെന്നും അവർ പറഞ്ഞു. അടൂർ പ്രകാശ് കെപിസിസി ആസ്ഥാനത്ത് നടത്തിയ പത്രസമ്മേളനം ശ്രദ്ധയിൽപ്പെട്ടിട്ടുണ്ടെങ്കിലും തനിക്ക് പാർട്ടി ഫോറം വഴി ഔദ്യോഗിക പരാതികളൊന്നും ലഭിച്ചിട്ടില്ലെന്നാണ് ദീപയുടെ പ്രതികരണം.
മുസ്ലിം ലീഗിന് ഭരണപരിഷ്കാര കമ്മീഷൻ അധ്യക്ഷസ്ഥാനം നൽകിയതിന് പിന്നാലെയാണ് യുഡിഎഫിലെ ഭിന്നതകൾ മറനീക്കി പുറത്തുവന്നത്. ഭരണ പരിഷ്കാര കമ്മീഷൻ അധ്യക്ഷന്റെയും ഡൽഹിയിലെ കേരളത്തിന്റെ പ്രത്യേക പ്രതിനിധിയുടെയും നിയമനങ്ങളും ബോർഡ്-കോർപ്പറേഷൻ വിഭജനങ്ങളും മുന്നണി ചർച്ച ചെയ്യാതെയാണ് നടത്തിയതെന്ന് ചൂണ്ടിക്കാട്ടി അടൂർ പ്രകാശ് പാർട്ടി അധ്യക്ഷൻ മല്ലികാർജ്ജുൻ ഖർഗെയെ നേരിൽക്കണ്ട് പരാതി നൽകിയിരുന്നു. ആരുടെയും പിന്തുണയില്ലാതെ സ്വന്തം അനുഭവങ്ങളുടെ വെളിച്ചത്തിലാണ് താൻ നിലപാട് വ്യക്തമാക്കുന്നതെന്നും പല സുപ്രധാന കാര്യങ്ങളും മാധ്യമങ്ങളിലൂടെയാണ് കൺവീനറായ താൻ അറിയുന്നതെന്നും അടൂർ പ്രകാശ് വാർത്താസമ്മേളനത്തിൽ പരസ്യമായി തുറന്നടിച്ചിരുന്നു.
മുന്നണി അധ്യക്ഷൻ എന്ന നിലയിൽ യോഗങ്ങൾ വിളിച്ചുചേർക്കാൻ മുഖ്യമന്ത്രി മുൻകൈ എടുത്തില്ലെന്നും സർക്കാർ അധികാരമേറ്റ ശേഷം ക്ലിഫ് ഹൗസിൽ വെറും ഒരു തവണ മാത്രമാണ് യോഗം ചേർന്നതെന്നും അടൂർ പ്രകാശ് ആരോപിച്ചിരുന്നു. സ്ഥാനമാനങ്ങൾ പങ്കിടുന്നതിലല്ല മറിച്ച് കൺവീനറുമായോ മുന്നണിയുമായോ കൂടിയാലോചനകൾ നടത്താത്തതിലാണ് തന്റെ വിയോജിപ്പെന്നും, അതേസമയം കോൺഗ്രസും യുഡിഎഫും തമ്മിൽ സംഘർഷങ്ങളൊന്നുമില്ലെന്നും അദ്ദേഹം ചൂണ്ടിക്കാട്ടിയിരുന്നു.
