ചെന്നൈ: മുല്ലപ്പെരിയാർ ഡാമിന്റെ വൃഷ്ടിമേഖലകളിലും തേനി ജില്ലയിലും സമൃദ്ധമായ മഴ ലഭിക്കുന്നതിനായി പ്രത്യേക പ്രാർത്ഥനകളുമായി തമിഴ്നാട്ടിലെ കർഷക സമൂഹം. ഇതിന്റെ ഭാഗമായി തേനി ജില്ലയിലെ കർഷകർ വെള്ളിയാഴ്ച പ്രശസ്തമായ വീരപാണ്ടി ഗൗമാരിയമ്മൻ ക്ഷേത്രത്തിൽ ഒത്തുചേർന്ന് വരുണപൂജ അർപ്പിച്ചു. കമ്പം വാലി വാട്ടർ യൂസേഴ്സ് അസോസിയേഷൻ മുൻകൈയെടുത്ത് നടത്തിയ ചടങ്ങിൽ കർഷകരും പ്രദേശവാസികളും പങ്കുചേർന്ന് പ്രത്യേക പൂജകളും യാഗങ്ങളും നടത്തി.
തേനി, മധുര, ദിണ്ടിഗൽ, ശിവഗംഗ, രാമനാഥപുരം എന്നീ അഞ്ച് തെക്കൻ ജില്ലകളുടെ പ്രധാന കുടിവെള്ള-ജലസേചന സ്രോതസ്സായ മുല്ലപ്പെരിയാറിന്റെ വൃഷ്ടിപ്രദേശങ്ങളിൽ ജലലഭ്യത ഉറപ്പാക്കാനാണ് ഇവർ പ്രാർത്ഥന നടത്തിയത്. നിലവിലെ കണക്കുകൾ പ്രകാരം 116.85 അടിയാണ് അണക്കെട്ടിലെ ജലനിരപ്പ്.
കഴിഞ്ഞ ജൂലൈ മാസത്തിലും മുല്ലപ്പെരിയാർ ഡാം പരിസരങ്ങളിൽ ആവശ്യത്തിന് മഴ പെയ്യുന്നതിനും കാർഷിക ആവശ്യങ്ങൾക്കുള്ള വെള്ളം ലഭിക്കുന്നതിനുമായി തമിഴ്നാട്ടിലെ വിവിധ കർഷക കൂട്ടായ്മകൾ സർവ്വമത പ്രാർത്ഥന സംഘടിപ്പിച്ചിരുന്നു. അണക്കെട്ടിൽ നിന്ന് തമിഴ്‌നാട്ടിലേക്ക് വെള്ളമൊഴുക്കുന്ന തേക്കടിയിലെ ഷട്ടറുകൾക്ക് സമീപത്തുവെച്ചായിരുന്നു അന്ന് അഞ്ച് ജില്ലകളിലെ കർഷക സംഘടനകളുടെ ആഭിമുഖ്യത്തിൽ പ്രാർത്ഥനാ ചടങ്ങുകൾ നടത്തിയത്.
