ഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രക്ഷോഭ പരിപാടികൾ കൂടുതൽ ശക്തമാക്കാനൊരുങ്ങി ഡിവൈഎഫ്ഐയും എസ്എഫ്ഐയും. ഇതിന്റെ ഭാഗമായി ഒക്ടോബർ 9-ന് രാജ്യത്തെ വിവിധ പ്രമുഖ നഗരങ്ങളിൽ ഇരു സംഘടനകളും ചേർന്ന് വൻ പ്രതിഷേധ പരിപാടികൾ സംഘടിപ്പിക്കും. തുടർന്ന് ഇതിനെ രാജ്യവ്യാപകമായ ബഹുജന പ്രക്ഷോഭമാക്കി മാറ്റാനാണ് തീരുമാനം. ജനാധിപത്യ മൂല്യങ്ങൾ സംരക്ഷിക്കുന്നതിനായി ഏതറ്റം വരെയും പോകുമെന്ന് വ്യക്തമാക്കിയ വിദ്യാർത്ഥി-യുവജന സംഘടനകൾ, ഒക്ടോബർ 10-ന് ജന്തർ മന്തറിലേക്ക് മാർച്ചും പ്രഖ്യാപിച്ചിട്ടുണ്ട്. സിജെപിയുടെ സമരത്തിന് ഡിവൈഎഫ്ഐയും എസ്എഫ്ഐയും പൂർണ്ണ പിന്തുണയും അറിയിച്ചു.
ഡൽഹി പോലീസ് എവിടെവെച്ച് തടയാൻ ശ്രമിച്ചാലും ആ സ്ഥലം ജന്തർ മന്തറായി മാറ്റുമെന്ന് സിജെപി നേതാവ് അഭിജിത്ത് ദീപ്കെ വ്യക്തമാക്കി. അതേസമയം, സമാധാനപരമായി പ്രതിഷേധിച്ചവർക്ക് നേരെ ഡൽഹി പോലീസ് ക്രൂരമായ മർദ്ദനം അഴിച്ചുവിട്ടതായി ആം ആദ്മി പാർട്ടിയും ഐസയും (AISA) കുറ്റപ്പെടുത്തി. ഇന്നലെ ഒറ്റ ദിവസം കൊണ്ടുമാത്രം 1,100 പേരെയാണ് പോലീസ് തടങ്കലിലാക്കിയത്. കസ്റ്റഡിയിലെടുത്ത ശേഷം വാഹനത്തിലേക്ക് കയറ്റുന്നതിനിടയിൽ ഒരു യുവാവിന്റെ മുഖത്ത് പോലീസ് ക്രൂരമായി ഇടിക്കുന്നതിന്റെ ദൃശ്യങ്ങൾ എഎപി പരസ്യപ്പെടുത്തിയിട്ടുണ്ട്.
ചൊവ്വാഴ്ച തെരഞ്ഞെടുപ്പ് കമ്മീഷൻ ആസ്ഥാനത്തേക്ക് മുന്നണി മാർച്ച് പ്രഖ്യാപിച്ചിട്ടുണ്ട്. ഇതിനിടെ, രാജ്യമൊട്ടാകെ നടക്കുന്ന സമരങ്ങളെ ഒരൊറ്റ കുടക്കീഴിൽ ഏകോപിപ്പിക്കുന്നതിനായി കോൺഗ്രസ് 'സത്യാഗ്രഹ' എന്ന പേരിൽ പുതിയ ഓൺലൈൻ പോർട്ടലിന് തുടക്കം കുറിച്ചു. ചെറുതും വലുതുമായ എല്ലാ സമരപരിപാടികളും ഇതിൽ രജിസ്റ്റർ ചെയ്യാൻ സാധിക്കുമെന്ന് കോൺഗ്രസ് നേതാവ് രാഹുൽ ഗാന്ധി വ്യക്തമാക്കി.
