മുംബൈ: മരിച്ചയാൾക്ക് പുനർജന്മമുണ്ടാകുമെന്ന പ്രതീക്ഷയിൽ നാല് വർഷത്തോളം ഫ്രീസറിൽ സംരക്ഷിച്ചുപോന്ന വയോധികന്റെ ഭൗതികശരീരം മുംബൈ മലാഡിലെ അടച്ചിട്ട കെട്ടിടത്തിൽ പോലീസ് കണ്ടെത്തി. 50 ലക്ഷത്തിലധികം രൂപ ചെലവിട്ടാണ് കുടുംബം മൃതദേഹം കേടുകൂടാതെ സൂക്ഷിച്ചത്. ശരീരം യുഎസിലെ 'ക്രയോണിക്സ്' കേന്ദ്രത്തിലേക്ക് മാറ്റാനുള്ള വഴികൾ ഇവർ അന്വേഷിച്ചിരുന്നതായും കണ്ടെത്തലുണ്ട്.
തിങ്കളാഴ്ച രാത്രിയോടെ കെട്ടിടത്തിൽ നിന്നും അസഹ്യമായ ദുർഗന്ധം പരന്നതിനെത്തുടർന്ന് നാട്ടുകാർ പരാതിപ്പെടുകയായിരുന്നു. തുടർന്ന് പോലീസെത്തി വാതിൽ തുറന്ന് പരിശോധിച്ചപ്പോഴാണ് ക്ലിനിക്കിലെ ഫ്രീസറിനുള്ളിൽ സൂക്ഷിച്ചിരുന്ന മൃതദേഹം കണ്ടത്. 2022-ൽ അന്തരിച്ച വ്യക്തിയുടെ ശരീരമാണ് മകനും മകളും ചേർന്ന് ഇത്രയും കാലം സൂക്ഷിച്ചത്. ഇതിനായി ഓരോ മാസവും ഒന്നര ലക്ഷത്തോളം രൂപ ഇവർ ചെലവഴിച്ചിരുന്നതായി പോലീസ് വ്യക്തമാക്കി. കാൻസറും വൃക്കരോഗവുമുൾപ്പെടെ പ്രായാധിക്യം മൂലമുള്ള ആരോഗ്യപ്രശ്നങ്ങളെ തുടർന്ന് 2022-ലായിരുന്നു ഇദ്ദേഹം മരണപ്പെടുന്നത്. തുടക്കത്തിൽ മലാഡിലെ വസതിയിലെ ഫ്രീസറിലാണ് മൃതദേഹം സൂക്ഷിച്ചിരുന്നതെങ്കിലും കെട്ടിടത്തിന്റെ പുനർനിർമ്മാണം തുടങ്ങിയതോടെ ഇത് ക്ലിനിക്കിലേക്ക് മാറ്റുകയായിരുന്നു.
കുടുംബനാഥന്റെ വിയോഗം സൃഷ്ടിച്ച കടുത്ത മാനസികാഘാതത്തിൽ അന്ത്യകർമ്മങ്ങൾ പൂർത്തിയാക്കാൻ കുടുംബത്തിന് മനസ്സ് അനുവദിച്ചിരുന്നില്ലെന്ന് പോലീസ് പറയുന്നു. ഇതേതുടർന്ന് ഭാര്യയും അഭിഭാഷകയായ മകളും ഉൾപ്പെടുന്ന കുടുംബാംഗങ്ങൾ, അമേരിക്കയിലെ ക്രയോണിക്സ് സംവിധാനത്തെക്കുറിച്ച് ഇന്റർനെറ്റിലൂടെ അന്വേഷിക്കുകയും നിയമപരമായി മരണം സംഭവിച്ചവരുടെ ഭൗതികശരീരം വർഷങ്ങളോളം സംരക്ഷിക്കുന്ന യുഎസ് സ്ഥാപനങ്ങളുമായി ബന്ധപ്പെടുകയും ചെയ്തു. ശരീരം സൂക്ഷിക്കുന്നതുമായി ബന്ധപ്പെട്ട നിയമാവലികൾ പഠിക്കാൻ ഇന്ത്യയിലെ അഭിഭാഷകരുമായും ഇവർ കൂടിയാലോചനകൾ നടത്തിയിരുന്നു. ഭാവിയിൽ വികസിച്ചേക്കാവുന്ന അത്യാധുനിക സാങ്കേതികവിദ്യകളിലൂടെ മനുഷ്യരെ പുനരുജ്ജീവിപ്പിക്കാൻ സാധിക്കുമെന്ന പ്രതീക്ഷയിലാണ് ഇത്തരം സ്ഥാപനങ്ങൾ ശരീരങ്ങൾ സംരക്ഷിക്കുന്നത്. ഇത്തരം സേവനങ്ങൾക്ക് പതിനായിരക്കണക്കിന് ഡോളറാണ് ചെലവ് വരുന്നത്; ചില ഏജൻസികൾ ഒറ്റത്തവണയായി 28,000 ഡോളറിലധികവും, മറ്റ് ചില കേന്ദ്രങ്ങൾ സംരക്ഷണരീതിക്ക് അനുസൃതമായി 45,000 ഡോളർ വരെയുമാണ് വാങ്ങുന്നത്.
ഇന്ത്യൻ നിയമവിദഗ്ദ്ധരുടെ ഉപദേശം തേടിയാണ് കുടുംബം ഈ സാധ്യതകൾ ആരാഞ്ഞിരുന്നതെന്നും പോലീസ് അറിയിച്ചു. ഇത്രയും നീണ്ട കാലയളവ് മൃതദേഹം സംസ്കരിക്കാതെ ഫ്രീസറിൽ സൂക്ഷിച്ചതുമായി ബന്ധപ്പെട്ട നിയമസാധുതകൾ പോലീസ് പരിശോധിക്കുകയാണ്. ഇക്കാരണത്താൽ സംഭവത്തിൽ നിലവിൽ കേസുകളൊന്നും രജിസ്റ്റർ ചെയ്തിട്ടില്ല.
