കൊൽക്കത്ത: സർവീസ് നടത്തിക്കൊണ്ടിരുന്ന ട്രെയിനിന്റെ സ്ലീപ്പർ കോച്ചിനുള്ളിൽ അപ്രതീക്ഷിതമായി പാമ്പിനെ കണ്ടത് യാത്രക്കാരിൽ വലിയ ഭീതി പടർത്തി. കതിഹാർ എക്സ്പ്രസിന്റെ സ്ലീപ്പർ കോച്ചിലാണ് ഓട്ടത്തിനിടയിൽ പാമ്പ് പ്രത്യക്ഷപ്പെട്ടത്. ബർത്തിന് താഴെ നിന്ന് പാമ്പ് പുറത്തേക്ക് വരുന്നതും തറയിലൂടെ ഇഴഞ്ഞുനീങ്ങുന്നതുമായ വീഡിയോ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.
കൊൽക്കത്ത ലക്ഷ്യമാക്കി നീങ്ങുകയായിരുന്ന കതിഹാർ എക്സ്പ്രസിൽ രാത്രി സമയത്താണ് ഈ സംഭവം ഉണ്ടായതെന്നാണ് ലഭ്യമാകുന്ന വിവരം. സ്ലീപ്പർ കമ്പാർട്ട്മെന്റിലെ സൈഡ് ലോവർ ബർത്തിനിടയിൽ നിന്ന് പാമ്പ് പുറത്തിറങ്ങി വരുന്ന കാഴ്ചയാണ് പുറത്തുവന്ന ദൃശ്യങ്ങളിലുള്ളത്. പാമ്പ് തറയിലൂടെ നീങ്ങിയതോടെ ഭയന്നുവിറച്ച യാത്രക്കാർ ബഹളം വെക്കുന്നതും വീഡിയോയിൽ കേൾക്കാം. തുടർന്ന് കോച്ചിന്റെ വാതിലിന് പിന്നിലേക്ക് പാമ്പ് മറയുകയായിരുന്നു.
വീഡിയോ സമൂഹമാധ്യമങ്ങളിൽ ചർച്ചയായതോടെ ട്രെയിൻ കോച്ചുകളിലെ സുരക്ഷിതത്വവും ശുചിത്വ പരിപാലനവും സംബന്ധിച്ച് വലിയ വിമർശനങ്ങളാണ് ഉയരുന്നത്. ഇത്രയും സുരക്ഷിതമെന്ന് കരുതുന്ന കോച്ചിനുള്ളിലേക്ക് പാമ്പ് എങ്ങനെ കയറിപ്പറ്റിയെന്നും, ടിക്കറ്റെടുത്ത് യാത്ര ചെയ്യുന്ന സാധാരണക്കാർക്ക് എന്ത് സുരക്ഷയാണ് റെയിൽവേ നൽകുന്നതെന്നും യാത്രക്കാർ രോഷത്തോടെ ചോദിക്കുന്നു.
