ചെന്നൈ: തമിഴ്നാട് മുഖ്യമന്ത്രി സി. ജോസഫ് വിജയ്യുടെ ലണ്ടൻ സന്ദർശനത്തെ രൂക്ഷമായി വിമർശിച്ച് ബി.ജെ.പി മുൻ സംസ്ഥാന പ്രസിഡന്റ് കെ. അണ്ണാമലൈ. തമിഴ്നാട്ടിലേക്ക് നിക്ഷേപങ്ങൾ കൊണ്ടുവരാൻ തിരഞ്ഞെടുക്കേണ്ട അനുയോജ്യമായ രാജ്യമല്ല യുകെ എന്ന് അദ്ദേഹം വ്യക്തമാക്കി. വിദേശരാജ്യങ്ങളെ ആശ്രയിക്കുന്നതിന് പകരം ഇന്ത്യയ്ക്കുള്ളിൽ നിന്ന് തന്നെയുള്ള നിക്ഷേപ സമാഹരണത്തിനാണ് സംസ്ഥാന സർക്കാർ കൂടുതൽ മുൻഗണന നൽകേണ്ടത്. ഉദ്യോഗസ്ഥ സംഘവുമായി സാമ്പത്തിക മുരടിപ്പ് നേരിടുന്ന യുകെയിലേക്ക് പോകുന്നതിന് പകരം രാജ്യത്തെ പ്രമുഖ വ്യവസായ നഗരങ്ങളുമായി സഹകരണം ഉറപ്പാക്കുകയാണ് ഭരണകൂടം ചെയ്യേണ്ടിയിരുന്നതെന്നും അദ്ദേഹം ചൂണ്ടിക്കാട്ടി.
ലണ്ടൻ നഗരത്തിന്റെ സാഹചര്യം തനിക്ക് കൃത്യമായി അറിയാമെന്നും നിലവിൽ അതൊരു നിശ്ചലമായ സമ്പദ്വ്യവസ്ഥയാണെന്നും അണ്ണാമലൈ പരിഹസിച്ചു. കേവലം ഒരു ശതമാനം വളർച്ച മാത്രമുള്ള യുകെയിലെത്തി തമിഴ്നാട്ടിൽ പണം മുടക്കാൻ ആവശ്യപ്പെട്ടാൽ അവർ എവിടെനിന്ന് നൽകുമെന്നും അദ്ദേഹം ചോദിച്ചു.
ഇതിന് പകരമായി മുഖ്യമന്ത്രി തമിഴ്നാട്ടിലെ തന്നെ പ്രധാന വ്യവസായ കേന്ദ്രങ്ങൾ സന്ദർശിച്ച് തദ്ദേശീയ സംരംഭകരുമായി നേരിട്ട് ആശയവിനിമയം നടത്തുകയായിരുന്നു വേണ്ടിയിരുന്നത്. എമിറേറ്റ്സ് വിമാനത്തിൽ ചെന്നൈയിൽ നിന്ന് ലണ്ടനിലേക്ക് പറക്കുന്നതിന് പകരം ഇൻഡിഗോ വിമാനത്തിൽ ചെന്നൈയിൽ നിന്നും മധുരയിലേക്കോ കോയമ്പത്തൂരിലേക്കോ പോകാൻ മുഖ്യമന്ത്രി തയ്യാറാകണം. അതല്ലെങ്കിൽ മുംബൈ, ഡൽഹി, ബെംഗളൂരു തുടങ്ങിയ ഇന്ത്യൻ നഗരങ്ങളെ സമീപിക്കുകയാണ് നിക്ഷേപം കണ്ടെത്താനുള്ള ഏറ്റവും മികച്ച വഴിയെന്നും അദ്ദേഹം പറഞ്ഞു.
മധുര ചേംബർ ഓഫ് കൊമേഴ്സുമായി സഹകരിക്കുകയോ, കോയമ്പത്തൂരിലെ തുണിമില്ലുകളുടെയും ഓട്ടോമൊബൈൽ വ്യവസായങ്ങളുടെയും ആവശ്യങ്ങൾ നേരിട്ട് മനസ്സിലാക്കുകയോ ചെയ്യണം. ബോംബെ, ഡൽഹി, ബെംഗളൂരു എന്നിവിടങ്ങളിൽ ചെന്ന് മൂലധനം ആകർഷിക്കുകയാണ് വേണ്ടത്; എല്ലാ ആവശ്യങ്ങൾക്കും വിദേശത്തേക്ക് വണ്ടി കയറേണ്ടതില്ലെന്നും അദ്ദേഹം അഭിപ്രായപ്പെട്ടു.
ലണ്ടൻ സന്ദർശനത്തിനിടെ നടൻ അജിത് കുമാർ, നടി തൃഷ എന്നിവർക്കൊപ്പം മുഖ്യമന്ത്രി വിജയ് നിൽക്കുന്ന ചിത്രങ്ങൾ പുറത്തുവന്നത് വലിയ ചർച്ചകൾക്ക് ഇടയാക്കിയിരുന്നു. ഇതിന് പിന്നാലെയാണ് അണ്ണാമലൈയുടെ രൂക്ഷവിമർശനം. അതേസമയം, ഈ യുകെ സന്ദർശനത്തിലൂടെ 15,000 കോടി രൂപയുടെ നിക്ഷേപ വാഗ്ദാനങ്ങളും പതിനായിരത്തോളം തൊഴിലവസരങ്ങളും ഉറപ്പാക്കാൻ സാധിച്ചെന്നാണ് തമിഴ്നാട് സർക്കാരിന്റെ ഔദ്യോഗിക അവകാശവാദം.
