ന്യൂഡൽഹി: ഭരണകൂടത്തിന്റെ അനാവശ്യ കൈകടത്തലുകൾ കൂടിയതോടെ ഇന്ത്യയിലെ ഉന്നതവിദ്യാഭ്യാസ മേഖലയിലെ അക്കാദമിക സ്വാതന്ത്ര്യം 'കടുത്ത നിയന്ത്രണങ്ങൾ' നേരിടുന്നതായി അന്താരാഷ്ട്ര ഗവേഷക കൂട്ടായ്മയുടെ വെളിപ്പെടുത്തൽ. ലോകമെമ്പാടുമുള്ള ഗവേഷകരുടെ അവകാശ സംരക്ഷണത്തിനായി ന്യൂയോർക്ക് ആസ്ഥാനമായി പ്രവർത്തിക്കുന്ന 'സ്കോളേഴ്സ് അറ്റ് റിസ്ക്' (എസ്.എ.ആർ) പുറത്തിറക്കിയ 'ഫ്രീ ടു തിങ്ക് 2026' എന്ന റിപ്പോർട്ടിലാണ് ഇന്ത്യയിലെ അക്കാദമിക സ്വാതന്ത്ര്യത്തിന്റെ ശോഷണത്തെക്കുറിച്ച് പരാമർശമുള്ളത്.
പഠനവിധേയമാക്കിയ 179 രാജ്യങ്ങളിൽ 50 എണ്ണത്തിലും കഴിഞ്ഞ പത്ത് വർഷങ്ങൾക്കിടയിൽ ഗവേഷണ സ്വാതന്ത്ര്യത്തിൽ വലിയ ഇടിവാണ് രേഖപ്പെടുത്തിയത്. 2026-ലെ അക്കാദമിക സ്വാതന്ത്ര്യ സൂചികയിൽ 'കടുത്ത നിയന്ത്രണമുള്ള' വിഭാഗത്തിലാണ് ഇന്ത്യ ഉൾപ്പെട്ടിരിക്കുന്നത്. പാകിസ്താൻ, യുക്രെയ്ൻ, ഇന്തൊനീഷ്യ, ഹോങ്കോംഗ്, വെസ്റ്റ്ബാങ്ക് എന്നിവയാണ് ഈ ഗണത്തിൽ ഇന്ത്യക്കൊപ്പമുള്ള മറ്റ് രാജ്യങ്ങൾ. എന്നാൽ ഗവേഷകർക്ക് ഒട്ടുംതന്നെ പ്രവർത്തന സ്വാതന്ത്ര്യമില്ലാത്ത 'പൂർണ്ണ നിയന്ത്രണമുള്ള' പട്ടികയിൽ റഷ്യയും ചൈനയും ഉൾപ്പെടെ ഒൻപത് രാജ്യങ്ങളാണുള്ളത്; അഫ്ഗാനിസ്താൻ, തുർക്കി, ഇറാൻ, സിറിയ, സിംബാബ്വെ, വെനിസ്വേല എന്നിവയും ഇതിൽ ഉൾപ്പെടുന്നു.
ബി.ജെ.പിയുടെ നേതൃത്വത്തിലുള്ള കേന്ദ്രഭരണകൂടം ഉന്നതവിദ്യാഭ്യാസ സ്ഥാപനങ്ങളിൽ വിവിധ രീതികളിൽ ഇടപെടലുകൾ നടത്തുന്നുണ്ടെന്ന് റിപ്പോർട്ടിൽ വ്യക്തമാക്കുന്നു. സർവ്വകലാശാലാ ഭരണം, പ്രധാന നിയമനങ്ങൾ, അക്കാദമിക മുൻഗണനകൾ എന്നിവയിലെല്ലാം ഈ സ്വാധീനമുണ്ട്. ഇതിനായി യു.ജി.സിയെയാണ് പ്രധാന മാർഗ്ഗമായി ഉപയോഗിക്കുന്നത്. കാമ്പസ് പരിപാടികൾ റദ്ദാക്കുക, വിദ്യാർത്ഥികളുടെ പ്രതിഷേധ പ്രകടനങ്ങൾ തടയുക, അധ്യാപകരെ പിരിച്ചുവിടുക തുടങ്ങിയ മാർഗ്ഗങ്ങളിലൂടെ എതിർപ്പുകളെ അടിച്ചമർത്തുന്ന പ്രവണത നിലനിൽക്കുന്നു. വിദ്യാർത്ഥി സംഘടനകളുടെ പ്രവർത്തനങ്ങൾ പലപ്പോഴും രാഷ്ട്രീയ പാർട്ടികളോടുള്ള കടുത്ത പ്രത്യയശാസ്ത്ര ആഭിമുഖ്യത്തിൽ നിന്നുള്ളതാണെന്നും ഇത് സംഘർഷങ്ങൾക്ക് കാരണമാകുന്നുണ്ടെന്നും റിപ്പോർട്ട് ചൂണ്ടിക്കാട്ടുന്നുണ്ട്. കേരളത്തിലെ കലാലയങ്ങളിലെ സാഹചര്യങ്ങളും ഇതിന് ഉദാഹരണമായി പരാമർശിക്കുന്നു.
അതേസമയം, ലോക സാമ്പത്തിക ഫോറം പുറത്തുവിട്ട ആഗോള ലിംഗ അന്തര സൂചികയിൽ (ഗ്ലോബൽ ജെൻഡർ ഗ്യാപ്പ് ഇൻഡക്സ്) 145 രാജ്യങ്ങളിൽ ഇന്ത്യ 131-ാം സ്ഥാനത്ത് തുടരുകയാണ്. ഐസ്ലൻഡ് പട്ടികയിൽ ഒന്നാമതെത്തിയപ്പോൾ ഫിൻലൻഡും നോർവേയും രണ്ടും മൂന്നും സ്ഥാനങ്ങൾ നേടി. പട്ടികയുടെ ഏറ്റവും താഴെയായി ചാഡ്, പാകിസ്താൻ, ഇറാൻ എന്നീ രാജ്യങ്ങളാണുള്ളത്. മുൻവർഷത്തെ അപേക്ഷിച്ച് പോയിന്റിൽ നേരിയ പുരോഗതിയുണ്ടായെങ്കിലും ഇന്ത്യയുടെ 131-ാം റാങ്കിൽ മാറ്റമില്ല. വിദ്യാഭ്യാസ മേഖലയിലാണ് രാജ്യം പ്രധാനമായും പുരോഗതി രേഖപ്പെടുത്തിയത്.
ആഗോളതലത്തിൽ ലിംഗസമത്വത്തിന്റെ തോത് കഴിഞ്ഞ വർഷത്തേക്കാൾ 0.4 ശതമാനം വർദ്ധിച്ച് 69.2 ശതമാനമായി. ഇന്ത്യയിലിത് 64.5 ശതമാനമാണ്. ഈ സ്കോർ 100 ശതമാനം ആകുമ്പോഴാണ് പൂർണ്ണ ലിംഗസമത്വം സാധ്യമാകുന്നത്. നിലവിലെ സ്ഥിതിഗതികൾ പരിശോധിച്ചാൽ ലോകത്ത് സമ്പൂർണ്ണ സ്ത്രീ-പുരുഷ സമത്വം കൈവരിക്കാൻ ഇനിയും 120 വർഷങ്ങൾ വേണ്ടിവരുമെന്ന് വേൾഡ് ഇക്കണോമിക് ഫോറം വ്യക്തമാക്കുന്നു. 2006-ൽ ഈ സർവേ തുടങ്ങിയതിനു ശേഷം ഇന്ത്യയുടെ സ്കോറിൽ 4.3 ശതമാനത്തിന്റെ വർദ്ധനവാണുണ്ടായിട്ടുള്ളത്.
