ചെന്നൈ: തെരഞ്ഞെടുക്കപ്പെട്ട് ചുരുങ്ങിയ നാളുകൾക്കകം നിയമസഭാ അംഗത്വം രാജിവെച്ച് അതേ മണ്ഡലത്തിൽ മറ്റൊരു രാഷ്ട്രീയ കക്ഷിയുടെ ബാനറിൽ വീണ്ടും ജനവിധി തേടുന്നത് തെരഞ്ഞെടുപ്പ് പ്രക്രിയയെയും ജനാധിപത്യ മൂല്യങ്ങളെയും അവഹേളിക്കുന്നതിന് തുല്യമാണെന്ന് മദ്രാസ് ഹൈക്കോടതി. തമിഴ്നാട്ടിലെ മധുരാന്തകം, ധരാപുരം മണ്ഡലങ്ങളിലെ മുൻ എം.എൽ.എമാരായ മരഗതം കുമാരവേൽ, പി. സത്യഭാമ എന്നിവർ പദവി ഉപേക്ഷിച്ച് ടി.വി.കെയിൽ ചേരുകയും, തുടർന്ന് അതേ മണ്ഡലങ്ങളിലെ ഉപതെരഞ്ഞെടുപ്പിൽ പുതിയ പാർട്ടിയുടെ സ്ഥാനാർത്ഥികളായി മത്സരിക്കുകയും ചെയ്യുന്ന പശ്ചാത്തലത്തിലാണ് കോടതിയുടെ ഈ നിർണ്ണായക വിമർശനം.
ജനങ്ങളുടെ വിശ്വാസവും പിന്തുണയും മുൻനിർത്തിയാണ് എം.എൽ.എമാർ തെരഞ്ഞെടുക്കപ്പെടുന്നതെന്ന് ജസ്റ്റിസുമാരായ എസ്.എം. സുബ്രഹ്മണ്യം, കെ. ഗോവിന്ദരാജൻ എന്നിവരുൾപ്പെട്ട ഡിവിഷൻ ബെഞ്ച് പൊതുതാൽപ്പര്യ ഹർജി പരിഗണിക്കവെ ചൂണ്ടിക്കാട്ടി. ജയിച്ചു കയറി അധികം വൈകാതെ തന്നെ സ്ഥാനം വലിച്ചെറിയുകയും അതേ മണ്ഡലത്തിൽ ഉപതെരഞ്ഞെടുപ്പ് അടിച്ചേൽപ്പിച്ച് വീണ്ടും കളത്തിലിറങ്ങുകയും ചെയ്യുന്നത് ജനാധിപത്യ വ്യവസ്ഥയെ പരിഹസിക്കലും വോട്ടർമാരെ അപമാനിക്കലുമാണെന്ന് ബെഞ്ച് വിലയിരുത്തി.
ഇത്തരം പ്രവണതകൾ തടയാൻ കർശന മാർഗ്ഗരേഖകൾ കൊണ്ടുവരുന്നതിനെക്കുറിച്ച് തെരഞ്ഞെടുപ്പ് കമ്മീഷൻ ചിന്തിക്കണം. ഇത്തരമൊരു സാഹചര്യം നേരിടാൻ നിലവിൽ ചട്ടങ്ങളില്ലാത്തതിനാൽ അസാധാരണ നടപടികളിലൂടെ ഇതിന് പരിഹാരം കാണാൻ കമ്മീഷന് അധികാരമുണ്ടോയെന്ന് പരിശോധിക്കാനും കോടതി നിർദ്ദേശിച്ചു. ചെന്നൈയിൽ നിന്നുള്ള അഭിഭാഷകൻ സുധനാണ് പൊതുതാൽപ്പര്യ ഹർജി സമർപ്പിച്ചത്. രാഷ്ട്രീയ ലക്ഷ്യങ്ങൾക്കായി സാമാജികർ ഉടനടി രാജിവെക്കുന്നത് വഴി ഉപതെരഞ്ഞെടുപ്പുകളുടെ ഭീമമായ ബാധ്യത നികുതിദായകരുടെ തലയിൽ അടിച്ചേൽപ്പിക്കപ്പെടുകയാണെന്ന് അദ്ദേഹം ബോധിപ്പിച്ചു. രാജിവെക്കുന്ന നേതാക്കളിൽ നിന്ന് തന്നെ ഇതിന്റെ ചിലവുകൾ ഈടാക്കുന്നതിന് ഇലക്ഷൻ ഡെപ്പോസിറ്റ് വ്യവസ്ഥകൾ ഉൾപ്പെടെയുള്ള നടപടികൾ കൊണ്ടുവരണമെന്നും ഹർജിയിൽ ആവശ്യപ്പെട്ടു.
രാഷ്ട്രീയ കാരണങ്ങളാൽ വേഗത്തിൽ രാജിവെക്കുന്ന എം.എൽ.എമാർക്ക് നിശ്ചിത കാലത്തേക്ക് വീണ്ടും മത്സരിക്കുന്നതിന് വിലക്കേർപ്പെടുത്താൻ നിയമനിർമ്മാണം പരിഗണിക്കണമെന്നും ഹർജിക്കാരൻ ചൂണ്ടിക്കാട്ടി. മധുരാന്തകം, ധരാപുരം ഉപതെരഞ്ഞെടുപ്പുകൾ സ്റ്റേ ചെയ്യണമെന്നും കുമാരവേൽ, സത്യഭാമ എന്നിവരുടെ നാമനിർദ്ദേശ പത്രികകൾ കമ്മീഷൻ സ്വീകരിക്കുന്നത് തടയണമെന്നും അദ്ദേഹം കോടതിയോട് അപേക്ഷിച്ചു. തമിഴ്നാട്ടിൽ നിലവിൽ ഏഴ് നിയമസഭാ മണ്ഡലങ്ങളാണ് ഒഴിഞ്ഞുകിടക്കുന്നത്. ഇതിൽ തിരുച്ചി ഈസ്റ്റ് സീറ്റും ഉൾപ്പെടുന്നു. രണ്ട് മണ്ഡലങ്ങളിൽ നിന്ന് വിജയിച്ച മുഖ്യമന്ത്രി വിജയ് ഒരെണ്ണം നിലനിർത്തിക്കൊണ്ട് തിരുച്ചി ഈസ്റ്റ് ഉപേക്ഷിച്ചതോടെയാണ് അവിടെ ഒഴിവ് വന്നത്. ശേഷിക്കുന്ന ആറ് സീറ്റുകൾ എ.ഐ.എ.ഡി.എം.കെ എം.എൽ.എമാർ രാജിവെച്ച് ടി.വി.കെയിൽ ചേർന്നതിനെ തുടർന്നാണ് ഒഴിഞ്ഞത്.
ഇതിൽ മധുരാന്തകം, ധരാപുരം മണ്ഡലങ്ങളിൽ മാത്രമാണ് തെരഞ്ഞെടുപ്പ് കമ്മീഷൻ ഇപ്പോൾ ഉപതെരഞ്ഞെടുപ്പ് പ്രഖ്യാപിച്ചിരിക്കുന്നത്. കേസുകൾ നിലനിൽക്കുന്ന അംബാസമുദ്രം, പെരുന്തുറൈ, കരൂർ, വിരാലിമലൈ, തിരുച്ചി ഈസ്റ്റ് എന്നിവിടങ്ങളിൽ ഇതുവരെ തീയതികൾ പ്രഖ്യാപിച്ചിട്ടില്ല. ഭരണകക്ഷിയായ ടി.വി.കെ രാഷ്ട്രീയ കുതിരക്കച്ചവടം നടത്തുകയാണെന്നാണ് പ്രതിപക്ഷത്തിന്റെ ആരോപണം. നിയമസഭയിൽ ഭൂരിപക്ഷം കൂട്ടാനായി പ്രതിപക്ഷ എം.എൽ.എമാരെ രാജിവെപ്പിച്ച് സ്വന്തം പാളയത്തിലെത്തിക്കുകയും തുടർന്ന് അവരെ തന്നെ ഉപതെരഞ്ഞെടുപ്പിൽ ഇറക്കുകയുമാണ് ചെയ്തതെന്ന് പ്രതിപക്ഷം കുറ്റപ്പെടുത്തിയെങ്കിലും ടി.വി.കെ ഈ ആക്ഷേപങ്ങൾ തള്ളിക്കളഞ്ഞു.
