ഡൽഹി: യു.ജി.സി-നെറ്റ് പരീക്ഷയിലെ മൂന്ന് വിഷയങ്ങളുടെ ചോദ്യപേപ്പറുകൾ റദ്ദാക്കി പുനഃപരീക്ഷ പ്രഖ്യാപിച്ച സംഭവത്തിൽ കേന്ദ്ര സർക്കാരിനും നാഷണൽ ടെസ്റ്റിംഗ് ഏജൻസിക്കുമെതിരെ (എൻ.ടി.എ) രൂക്ഷ വിമർശനവുമായി കോൺഗ്രസ് എം.പി രാഹുൽ ഗാന്ധി. പരീക്ഷാ നടത്തിപ്പ് ബോർഡ് വരുത്തിവെച്ച ഗുരുതര വീഴ്ചകൾക്ക് വിദ്യാർത്ഥികളിൽ നിന്ന് പിഴയീടാക്കുന്ന സാഹചര്യമാണ് നിലവിലുള്ളതെന്ന് അദ്ദേഹം കുറ്റപ്പെടുത്തി.
എൻ.ടി.എ തെറ്റുകൾ ചെയ്യുമ്പോൾ അതിന്റെ ദുരിതവും ശിക്ഷയും അനുഭവിക്കേണ്ടി വരുന്നത് വിദ്യാർത്ഥികളാണെന്ന് രാഹുൽ ഗാന്ധി പറഞ്ഞു. രാജ്യത്തെ വിദ്യാഭ്യാസ രംഗം ഇന്ന് വിദ്യാർത്ഥികളെ ചൂഷണം ചെയ്യുന്ന യന്ത്രമായി മാറിയിരിക്കുകയാണ്. ഇത് ഉദ്യോഗാർത്ഥികളുടെ ആത്മവിശ്വാസം തകർക്കുന്നു. ചോദ്യപേപ്പർ ചോർന്നിട്ടുണ്ടോ എന്ന കാര്യത്തിൽ മറുപടി നൽകാൻ എൻ.ടി.എ തയ്യാറാകുന്നില്ല. സംഭവിച്ച തെറ്റുകൾ അംഗീകരിക്കാൻ മോദി സർക്കാർ മടിക്കുകയാണെന്നും, ഉണ്ടായ വീഴ്ചകളുടെ ഉത്തരവാദിത്തം എൻ.ടി.എ ഏറ്റെടുക്കണമെന്നും അദ്ദേഹം ആവശ്യപ്പെട്ടു.
"മോദിജി, താങ്കളുടെ എൻ.ടി.എ ഇപ്പോൾ ചെയ്തുകൂട്ടിയത് എന്താണെന്ന് കാണൂ. പരീക്ഷയ്ക്കായി മാസങ്ങളോളം തയ്യാറെടുത്ത ആയിരക്കണക്കിന് ഉദ്യോഗാർത്ഥികൾക്കാണ് നാഷണൽ ടെസ്റ്റിംഗ് ഏജൻസിയുടെ വീഴ്ച മൂലം വീണ്ടും പരീക്ഷ എഴുതേണ്ട ദുരവസ്ഥ ഉണ്ടായിരിക്കുന്നത്. വർഷങ്ങളോളം തയ്യാറെടുപ്പുകൾ നടത്തി, ഫോമുകൾ പൂരിപ്പിച്ച്, ഫീസടച്ച്, ദൂരദേശങ്ങളിലെ പരീക്ഷാ കേന്ദ്രങ്ങളിലേക്ക് യാത്ര ചെയ്ത പതിനായിരക്കണക്കിന് കുട്ടികൾ വരുന്ന സെപ്റ്റംബറിൽ ഇതെല്ലാം വീണ്ടും ആവർത്തിക്കേണ്ടി വരുന്നു. എൻ.ടി.എ തെറ്റ് ചെയ്യുന്നു, എന്നാൽ അതിന്റെ ദുരിതം പേറുന്നത് പാവം വിദ്യാർത്ഥികളാണ്," രാഹുൽ ഗാന്ധി വ്യക്തമാക്കി.
പരീക്ഷയ്ക്ക് മുൻപ് ഈ ചോദ്യപേപ്പറുകൾ ചോർന്നിരുന്നോ എന്ന സുപ്രധാന ചോദ്യത്തിന് എൻ.ടി.എ ഇപ്പോഴും ഉത്തരം നൽകുന്നില്ലെന്നും അദ്ദേഹം ചൂണ്ടിക്കാട്ടി. മൂന്ന് പേപ്പറുകളെക്കുറിച്ച് ഉയർന്ന പരാതികൾ ഒരു സമിതി പരിശോധിച്ചതിന് ശേഷമാണ് എൻ.ടി.എ പുനഃപരീക്ഷ പ്രഖ്യാപിച്ചത്. രാജ്യത്തെ പരീക്ഷാ സമ്പ്രദായത്തിൽ നിലനിൽക്കുന്ന ആഴത്തിലുള്ള പ്രശ്നങ്ങളാണ് ഈ സംഭവത്തിലൂടെ പുറത്തുവരുന്നതെന്നും, ഭരണപരമായ പോരായ്മകൾ മൂലം വിദ്യാർത്ഥിസമൂഹം കഷ്ടപ്പെടുമ്പോഴും അതിന്റെ ഉത്തരവാദിത്തം ഏറ്റെടുക്കാൻ സർക്കാർ പരാജയപ്പെടുകയാണെന്നും രാഹുൽ ഗാന്ധി ആരോപിച്ചു.
