ശബരിമല: തരുൺ മൂർത്തിയുടെ സംവിധാനത്തിൽ മോഹൻലാൽ നായകനാകുന്ന 'അതിമനോഹരം' എന്ന പുതിയ സിനിമയ്ക്ക് ശബരിമല സന്നിധാനത്ത് ചിത്രീകരണാനുമതി നിഷേധിച്ച് വനംവകുപ്പ്. ഇതോടെ സന്നിധാനത്തോ അനുബന്ധ പ്രദേശങ്ങളിലോ സിനിമയുടെ ഷൂട്ടിംഗ് നടക്കില്ലെന്ന് വ്യക്തമായി. ക്ഷേത്രം സ്ഥിതി ചെയ്യുന്ന പ്രദേശം പെരിയാർ ടൈഗർ റിസർവിന്റെ പരിധിയിൽ വരുന്നതിനാലാണ് ഇവിടെ ചിത്രീകരണത്തിന് വനംവകുപ്പ് അനുമതി നൽകാതിരുന്നത്.
അതേസമയം, പമ്പ വരെയുള്ള ഭാഗങ്ങൾ ഉൾപ്പെടുന്ന റാന്നി വനം ഡിവിഷൻ പരിധിയിൽ സിനിമയുടെ ചിത്രീകരണത്തിന് അനുമതി ലഭിച്ചിട്ടുണ്ട്. ഇതോടെ പമ്പയ്ക്ക് മുൻപുള്ള പ്രദേശങ്ങളിൽ നാളെ ഷൂട്ടിംഗ് നടക്കും. ചിത്രത്തിന്റെ രണ്ടാം ഷെഡ്യൂളാണ് ശബരിമല പശ്ചാത്തലമാക്കി പൂർത്തിയാക്കാൻ അണിയറപ്രവർത്തകർ തീരുമാനിച്ചിരുന്നത്. നേരത്തെ കർശന ഉപാധികളോടെ സന്നിധാനത്തും പരിസരങ്ങളിലും ചിത്രീകരണത്തിന് ദേവസ്വം ബോർഡ് അനുമതി നൽകിയിരുന്നു. മുൻപ് മകരവിളക്ക് കാലത്ത് അനുമതിയില്ലാതെ ശബരിമലയിൽ സിനിമാ ചിത്രീകരണം നടത്തിയത് വലിയ വിവാദങ്ങൾക്ക് വഴിവെച്ചിരുന്നു. ഇതിന്റെ പശ്ചാത്തലത്തിൽ ഇത്തവണ ഔദ്യോഗികമായി അപേക്ഷ സമർപ്പിച്ചാണ് അണിയറപ്രവർത്തകർ അനുമതി തേടിയത്.
