വാഷിങ്ടൺ: 2026-ലെ യുഎസ് ഇടക്കാല തെരഞ്ഞെടുപ്പ് സുരക്ഷയുടെ ഭാഗമായി അമേരിക്കൻ രാഷ്ട്രീയത്തെ സ്വാധീനിക്കാൻ ശ്രമിച്ച പതിമൂവായിരത്തോളം വ്യാജ അക്കൗണ്ടുകൾ മൈക്രോ ബ്ലോഗിങ് പ്ലാറ്റ്‌ഫോമായ എക്സ് നീക്കം ചെയ്തു. തെരഞ്ഞെടുപ്പിലെ സ്ഥാനാർത്ഥികളെയും പ്രമുഖ വ്യക്തികളെയും ലക്ഷ്യമിട്ട് അമേരിക്കയെ വിമർശിക്കുന്ന തരത്തിലുള്ള ഉള്ളടക്കങ്ങൾ പ്രചരിപ്പിച്ചിരുന്ന ഇറാൻ, റഷ്യ, ചൈന എന്നീ രാജ്യങ്ങളുമായി ബന്ധമുള്ള അക്കൗണ്ടുകൾക്കെതിരെയാണ് നടപടി.
പ്ലാറ്റ്‌ഫോമിന്റെ സുരക്ഷയും മുൻകരുതലുകളും വിലയിരുത്തുന്നതിനായി നടത്തിയ സജീവ പരിശോധനകളിലാണ് ഈ സംഘടിത ശൃംഖലകളെ കണ്ടെത്തിയതെന്ന് കമ്പനി വ്യക്തമാക്കി. യുഎസ് രാഷ്ട്രീയത്തിൽ ഇടപെടുന്നതിനും തെറ്റായ പ്രചാരണങ്ങൾ അഴിച്ചുവിടുന്നതിനുമായി ഇത്തരം വ്യാജ അക്കൗണ്ടുകളുടെ കൂട്ടായ്മകൾ പ്രവർത്തിച്ചതായി എക്സ് ചൂണ്ടിക്കാട്ടി.
സ്പാം ശൃംഖലകളായാലും പ്ലാറ്റ്‌ഫോമിന്റെ വിശ്വാസ്യത തകർക്കുന്ന സംഘടിത വ്യാജ നീക്കങ്ങളായാലും അവ കൃത്യമായി കണ്ടെത്തി തടയാൻ സജീവമായി പ്രവർത്തിക്കുന്നുണ്ടെന്ന് എക്സിന്റെ ഗ്ലോബൽ ഗവൺമെന്റ് അഫയേഴ്സ് ടീം ഔദ്യോഗിക കുറിപ്പിലൂടെ അറിയിച്ചു.
