വാഷിങ്ടൺ: വധശിക്ഷ നടപ്പിലാക്കുന്നതിനായി രണ്ട് പ്രാവശ്യം വിഷം ശരീരത്തിലേക്ക് പ്രവേശിപ്പിച്ചിട്ടും ജീവൻ നഷ്ടപ്പെടാതിരുന്ന കൊലക്കേസ് പ്രതിയുടെ ശിക്ഷാവിധി പുനഃപരിശോധിക്കണമെന്ന ആവശ്യവുമായി അഭിഭാഷക സംഘം കോടതിയിൽ. യുഎസിലെ ടെന്നിസിയിലാണ് വനിതാ തടവുകാരിയായ ക്രിസ്റ്റ പൈക്കിന്റെ (50) വധശിക്ഷ നടപ്പിലാക്കാനുള്ള നീക്കം പരാജയപ്പെട്ട് നിയമസംവിധാനത്തിന് മുന്നിൽ സങ്കീർണ്ണ പ്രതിസന്ധി സൃഷ്ടിച്ചത്. സംഭവം വൻ വിവാദങ്ങൾക്ക് വഴിവെച്ചതോടെ സംസ്ഥാനത്തെ മുഴുവൻ വധശിക്ഷകളും താൽക്കാലികമായി റദ്ദാക്കാൻ ടെന്നിസി ഗവർണർ ഉത്തരവിട്ടു.
തന്റെ സഹപാഠിയായ കോളിൻ സ്ലെമ്മറെ 1995-ൽ കൊലപ്പെടുത്തിയ കേസിൽ തൊട്ടടുത്ത വർഷമാണ് ക്രിസ്റ്റ പൈക്കിന് കോടതി വധശിക്ഷ വിധിച്ചത്. തുടർന്ന് ശിക്ഷാവിധി കാത്ത് ജയിലിൽ കഴിയവേ, 2001-ൽ മറ്റൊരു സഹതടവുകാരിയെ ശ്വാസം മുട്ടിച്ച് കൊലപ്പെടുത്താൻ ശ്രമിച്ചെന്ന കേസും ഇവരുടെ പേരിലുണ്ട്. കഴിഞ്ഞ ദിവസമായിരുന്നു പൈക്കിന്റെ വധശിക്ഷ നടപ്പിലാക്കാൻ അധികൃതർ നിശ്ചയിച്ചിരുന്നത്.
കഴിഞ്ഞ രണ്ട് നൂറ്റാണ്ടിനിടെ ടെന്നിസിയിൽ വധശിക്ഷയ്ക്ക് വിധിക്കപ്പെടുന്ന ആദ്യ വനിത എന്ന അവസ്ഥയിലായിരുന്നു പൈക്ക്. 'പെന്റോബാർബിറ്റൽ' എന്ന അതീവ മാരകമായ വിഷക്കൂട്ട് രണ്ട് തവണ ശരീരത്തിലേക്ക് കുത്തിവെച്ചെങ്കിലും പ്രതി ബോധരഹിതയായതല്ലാതെ മരണം സംഭവിച്ചില്ല. ഇതേത്തുടർന്ന് അധികൃതർ ഇവരെ അടിയന്തരമായി ആശുപത്രിയിലേക്ക് മാറ്റുകയായിരുന്നു.
സംഭവത്തിന് പിന്നാലെ, പൈക്കിന്റെ വധശിക്ഷ അന്തിമമായി റദ്ദാക്കണമെന്ന് ആവശ്യപ്പെട്ട് അവരുടെ അഭിഭാഷകർ കോടതിയെ സമീപിച്ചു. ബാല്യകാലത്ത് പൈക്ക് നേരിടേണ്ടി വന്ന ക്രൂരമായ ലൈംഗിക ചൂഷണങ്ങളും അവഗണനകളും കോടതി സമഗ്രമായി വിലയിരുത്തണമെന്നാണ് ഹർജിയിലെ പ്രധാന വാദം. കൊടിയ പീഡനങ്ങളാണ് കഴിഞ്ഞ ദിവസം പൈക്കിന് നേരിടേണ്ടി വന്നത്. ഇത്തരമൊരു പാളിച്ചയെക്കുറിച്ച് നേരത്തെ മുന്നറിയിപ്പ് നൽകിയിരുന്നെങ്കിലും കോടതി അത് പരിഗണിച്ചില്ല. കഴിഞ്ഞ 30 വർഷക്കാലമായി ഇവർ അനുഭവിച്ച യാതനകൾ വിവരണാതീതമാണ്. ഏതൊരു മനുഷ്യനും താങ്ങാവുന്നതിലും അപ്പുറമുള്ള കൊടും ക്രൂരതകളുടെ ഒടുവിലത്തെ ഉദാഹരണമാണ് വധശിക്ഷ നടപ്പാക്കാനാവാതെ ഇവർക്കിപ്പോൾ നേരിടേണ്ടി വന്നിട്ടുള്ള മാനസിക-ശരീരിക ആഘാതം. ഇനി ഇത്തരം പരീക്ഷണങ്ങൾ ആവർത്തിക്കരുതെന്നും, ശിക്ഷാവിധി ഉടനടി ജീവപര്യന്തം തടവായി ഇളവ് ചെയ്തു നൽകണമെന്നും അഭിഭാഷകർ കോടതിയിൽ അപേക്ഷിച്ചു.
ശിക്ഷ നടപ്പിലാക്കാൻ ശ്രമിച്ച ഘട്ടത്തിലെ വീഴ്ചകളെക്കുറിച്ചും അഭിഭാഷകൻ കോടതിയിൽ വിശദീകരിച്ചു. ഏതാണ്ട് ഒരു മണിക്കൂറോളം സമയമെടുത്ത് രണ്ട് തവണയാണ് വിഷം കുത്തിവെച്ചത്. ഇടതുകൈയിൽ ഏഴോളം സൂചികൾ തുളച്ചുകയറ്റിയതിൽ ഒരെണ്ണം വളഞ്ഞ രൂപത്തിലായിരുന്നു. വിഷം ഉള്ളിൽ ചെന്ന ശേഷവും പൈക്ക് ശ്വാസമെടുക്കുന്നുണ്ടായിരുന്നു. വലിയ ഒച്ചയിൽ അവർ കൂർക്കം വലിക്കുകയും ചെയ്തു. മരണം സംഭവിക്കാതിരുന്നതോടെ വിവരം ജയിൽ അധികൃതർ കോടതിയെ അറിയിക്കുകയും ഇവരെ ആശുപത്രിയിലേക്ക് മാറ്റുകയുമായിരുന്നുവെന്ന് അഭിഭാഷകൻ കൂട്ടിച്ചേർത്തു.
ഈ വിഷയത്തിൽ സമഗ്രമായ അന്വേഷണം നടത്താൻ ടെന്നിസി ഗവർണർ ബിൻ ലീ ഉത്തരവിട്ടു. അന്വേഷണ നടപടികൾ സമയബന്ധിതമായി പൂർത്തിയാക്കുമെന്നും, അതുവരെ സംസ്ഥാനത്ത് ഒരു വധശിക്ഷയും നടപ്പിലാക്കില്ലെന്നും ഗവർണർ ബിൻ ലീ വ്യക്തമാക്കി.
