ന്യൂഡൽഹി: അന്താരാഷ്ട്ര വിപണിയിൽ ഭക്ഷ്യവസ്തുക്കളുടെ വില നാല് വർഷത്തിനിടയിലെ ഏറ്റവും ഉയർന്ന തലത്തിലേക്ക് ഉയർന്നതായി ഐക്യരാഷ്ട്രസഭയുടെ ഭക്ഷ്യ-കാർഷിക സംഘടന (എഫ്എഒ). പ്രതികൂല കാലാവസ്ഥയും ആഗോള തലത്തിലെ ചരക്കുനീക്കത്തിലുണ്ടായ വിതരണ തടസ്സങ്ങളുമാണ് അന്താരാഷ്ട്ര ചരക്കുവിപണികളെ സാരമായി ഉലച്ചതെന്ന് എഫ്എഒ വ്യക്തമാക്കി. സംഘടന പുറത്തുവിട്ട കണക്കുകൾ പ്രകാരം സെപ്റ്റംബറിലെ ഭക്ഷ്യവില സൂചിക ശരാശരി 136.0 പോയിന്റിലെത്തി. ഓഗസ്റ്റിൽ രേഖപ്പെടുത്തിയ പുതുക്കിയ നിരക്കായ 134.0 പോയിന്റിൽ നിന്നാണ് ഈ വർദ്ധനവ്. 2022 നവംബർ മാസത്തിന് ശേഷം രേഖപ്പെടുത്തുന്ന ഏറ്റവും ഉയർന്ന സൂചികയാണിത്.
കാലാവസ്ഥാ വ്യതിയാനം സൃഷ്ടിച്ച വെല്ലുവിളികൾക്കൊപ്പം ഹോർമൂസ് കടലിടുക്കിലും കരിങ്കടലിലും ചരക്കുഗതാഗതത്തിനുണ്ടായ തടസ്സങ്ങളും ആഗോള ഭക്ഷ്യവില കുതിച്ചുയരാൻ കാരണമായി. നിലവിലെ അനിശ്ചിതാവസ്ഥ തുടരുകയാണെങ്കിൽ ഭക്ഷ്യോൽപ്പന്നങ്ങളുടെയും ഊർജ്ജത്തിന്റെയും ഇറക്കുമതിയെ വലിയതോതിൽ ആശ്രയിക്കുന്ന രാജ്യങ്ങളിൽ കടുത്ത വിലക്കയറ്റം അനുഭവപ്പെട്ടേക്കാമെന്ന് എഫ്എഒ ചീഫ് ഇക്കണോമിസ്റ്റ് മാക്സിമോ ടൊറേറോ മുന്നറിയിപ്പ് നൽകി. പ്രധാന നിത്യോപയോഗ വസ്തുക്കളിൽ പഞ്ചസാരയ്ക്കാണ് ഏറ്റവും കുത്തനെയുള്ള വിലവർദ്ധനവ് ഉണ്ടായത്. ഓഗസ്റ്റുമായി താരതമ്യം ചെയ്യുമ്പോൾ സെപ്റ്റംബറിൽ പഞ്ചസാര വില സൂചികയിൽ 6.1 ശതമാനത്തിന്റെ വർദ്ധനവുണ്ടായി. അടുപ്പിച്ച് മൂന്നാം മാസമാണ് പഞ്ചസാരയുടെ നിരക്ക് മുകളിലേക്ക് ഉയരുന്നത്. ഇതോടെ ആഗോളതലത്തിൽ പഞ്ചസാരവില കഴിഞ്ഞ 18 മാസത്തെ ഏറ്റവും ഉയർന്ന നിരക്കിലെത്തി. പ്രധാന ഉത്പാദന രാജ്യങ്ങളിലെ പ്രതികൂല കാലാവസ്ഥയും വിതരണത്തിലുള്ള കുറവുകളുമാണ് വിലയെ സ്വാധീനിച്ചത്. ഒപ്പം ശക്തമായ എൽ നിനോ പ്രതിഭാസത്തെക്കുറിച്ചുള്ള ആശങ്കകൾ ഉൽപ്പാദനത്തെയും ദോഷകരമായി ബാധിച്ചു.
ധാന്യങ്ങളുടെ വിലയിലും സെപ്റ്റംബറിൽ കാര്യമായ മുന്നേറ്റം പ്രകടമായി. എഫ്എഒയുടെ ധാന്യവില സൂചിക പ്രതിമാസ നിരക്കിൽ 5.1 ശതമാനം ഉയർന്നു. അമേരിക്കൻ വിപണിയിലെ ചോളം ഉത്പാദനത്തിലുണ്ടായ ഇടിവും കരിങ്കടൽ റൂട്ടിലൂടെയുള്ള ധാന്യ കയറ്റുമതിയിൽ നേരിട്ട പ്രതിബന്ധങ്ങളുമാണ് ഇതിന് ഇടയാക്കിയത്.
പാം ഓയിൽ നിരക്കുകൾ ഉയർന്നതിനെത്തുടർന്ന് സസ്യ എണ്ണകളുടെ വില സെപ്റ്റംബറിൽ 0.9 ശതമാനം വർദ്ധിച്ചു. വിപണിയിലെ ഉയർന്ന ഡിമാൻഡും കാലാവസ്ഥാ വ്യതിയാനം ഉൽപ്പാദനത്തെ ബാധിക്കുമെന്ന ഭീതിയുമാണ് ഈ വർദ്ധനവിന് വഴിതെളിച്ചത്. എന്നാൽ വിപരീതമായി മാംസവില സൂചികയിൽ 1.1 ശതമാനത്തിന്റെ കുറവ് രേഖപ്പെടുത്തി. കോഴിയിറച്ചി വിലയിലുണ്ടായ ഇടിവും യൂറോപ്യൻ യൂണിയൻ കൊണ്ടുവന്ന പുതിയ ഇറക്കുമതി ചട്ടങ്ങൾ കാരണമുണ്ടായ ഡിമാൻഡ് കുറവുമാണ് മാംസവിലയെ താഴേക്ക് വലിച്ചത്.
