ടെൽ അവീവ്: ദുബായിൽ നിന്നും ഇസ്രായേലിലെ ടെൽ അവീവിലേക്ക് പറന്ന യാത്രാവിമാനം റാഞ്ചാനുള്ള ശ്രമത്തിനിടെ ഉണ്ടായേക്കാമായിരുന്ന വൻ ദുരന്തം ഒഴിവാക്കിയത് ഫ്ലൈറ്റ് ക്യാപ്റ്റന്റെ ചങ്കൂറ്റത്തോടെയുള്ള ഇടപെടൽ മൂലമെന്ന് റിപ്പോർട്ട്. ദുബായിൽ സ്ഥിരതാമസമാക്കിയ ക്യാപ്റ്റൻ സ്മിത്ത് മച്ചാർ എന്ന ഇന്ത്യൻ പൈലറ്റാണ് അതിസാഹസികമായി വിമാനം ലാൻഡ് ചെയ്യിപ്പിച്ചത്. നൂറ്റെൺപതോളം ഇസ്രായേലി യാത്രക്കാരുണ്ടായിരുന്ന വിമാനം കോ-പൈലറ്റ് തകർക്കാൻ ശ്രമിച്ചതോടെയാണ് ആകാശത്ത് അത്യന്തം നാടകീയമായ രംഗങ്ങൾ അരങ്ങേറിയത്. കോ-പൈലറ്റ് വിമാനത്തിന്റെ നിയന്ത്രണം പിടിച്ചെടുക്കാൻ തുടങ്ങിയതോടെ സ്മിത്ത് ഇയാളെ ധീരമായി ചെറുത്തുതോൽപ്പിക്കുകയും തുടർന്ന് യാത്രാവിമാനം സുരക്ഷിതമായി താഴെയിറക്കുകയുമായിരുന്നു. കോ-പൈലറ്റിൽ നിന്നുള്ള ശക്തമായ ആക്രമണത്തിനിടെ ക്യാപ്റ്റൻ സ്മിത്തിന് ശരീരത്തിൽ ഒന്നിലധികം തവണ കുത്തേറ്റു. ഗുരുതരമായി പരിക്കേറ്റ് ചോരയൊലിക്കുന്ന അവസ്ഥയിൽ വിമാനത്തിൽ കിടക്കുന്ന സ്മിത്തിന്റെ ദൃശ്യങ്ങളും ഇതിനകം പുറത്തുവന്നിട്ടുണ്ട്.
ബോയിംഗ് 737 വിമാനങ്ങൾ പറത്തുന്നതിൽ പതിമൂന്ന് വർഷത്തിലേറെ പ്രവർത്തനപരിചയമുള്ള പരിചയസമ്പന്നനായ കൊമേഴ്സ്യൽ പൈലറ്റാണ് സ്മിത്ത്. 2022 ജൂൺ മുതലാണ് അദ്ദേഹം ഫ്ലൈദുബായ് വിമാനക്കമ്പനിയിൽ ക്യാപ്റ്റനായി സേവനമനുഷ്ഠിച്ചു തുടങ്ങിയത്. ഇതിനുമുമ്പ് പതിനൊന്ന് വർഷക്കാലം സ്പൈസ് ജെറ്റിൽ സീനിയർ കമാൻഡറായും ലൈൻ ട്രെയിനിംഗ് ക്യാപ്റ്റനായും അദ്ദേഹം സേവനം അനുഷ്ഠിച്ചിരുന്നു.
ബുധനാഴ്ച ഫ്ലൈദുബായ് FZ1073 എന്ന വിമാനത്തിന്റെ നിയന്ത്രണം ബലമായി പിടിച്ചെടുത്ത് കോ-പൈലറ്റ് വിമാനം അപകടപ്പെടുത്താൻ ശ്രമിക്കുകയായിരുന്നു. അപൂർവ്വമായ മനക്കരുത്തും ധൈര്യവും പ്രകടിപ്പിച്ച ഈ വീരന്മാരെ താൻ അഭിവാദ്യം ചെയ്യുന്നുവെന്നും നിരവധി വിലപ്പെട്ട ജീവനുകൾ രക്ഷിക്കാനും വലിയൊരു ദുരന്തം ഇല്ലാതാക്കാനും അവർക്ക് സാധിച്ചുവെന്നും ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു പ്രതികരിച്ചു. കോക്പിറ്റിലേക്ക് ഇരച്ചുകയറി വിമാനത്തിലെ സംവിധാനങ്ങൾ തകർക്കാൻ ശ്രമിച്ച ഒമാനി പൈലറ്റിനെ കീഴ്പ്പെടുത്താൻ സഹായിച്ച ഒരു ഇസ്രായേലി യാത്രക്കാരനുമായി താൻ നേരിട്ട് സംസാരിച്ചതായും നെതന്യാഹു കൂട്ടിച്ചേർത്തു. അതേസമയം, സൗദിയിലെ തബൂക്കിലേക്ക് വഴിതിരിച്ചുവിട്ട ഫ്ലൈദുബായ് വിമാനത്തിന്റെ പൈലറ്റ് സ്മിത്ത് മച്ചാറിന്റെ ആരോഗ്യനില റിയാദിലെ ഇന്ത്യൻ എംബസിയും ജിദ്ദയിലെ കോൺസുലേറ്റും കൃത്യമായി വിലയിരുത്തി വരികയാണെന്ന് എംബസി അറിയിച്ചു. തബൂക്കിലെ ആശുപത്രിയിൽ പ്രവേശിപ്പിച്ചിട്ടുള്ള അദ്ദേഹത്തിന് മികച്ച ചികിത്സ ഉറപ്പാക്കിയിട്ടുണ്ട്. സാഹസിക ഇടപെടൽ നടത്തിയ ക്യാപ്റ്റൻ സ്മിത്ത് മച്ചാറിനെ അഭിനന്ദിച്ച് പ്രധാനമന്ത്രി നരേന്ദ്ര മോദിയും രംഗത്തെത്തി.
ഇന്നലെ ഉച്ചയോടെയാണ് വിമാനത്തിനുള്ളിൽ അപ്രതീക്ഷിത സംഭവങ്ങൾ ആരംഭിക്കുന്നത്. ദുബായ്-ടെൽ അവീവ് സർവീസ് വിമാനം റാഞ്ചിയെന്ന നിലയിലായിരുന്നു ആദ്യ വിവരങ്ങൾ പുറത്തുവന്നത്. എന്നാൽ സംഭവം ഹൈജാക്കിങ് അല്ലെന്നും പൈലറ്റുമാർ തമ്മിലുള്ള കയ്യാങ്കളിയാണെന്നും പിന്നീട് ഇസ്രായേൽ വിശദീകരിച്ചു. ഫ്ലൈദുബായ് വിമാനം സൗദി അറേബ്യയിലേക്ക് വഴിതിരിച്ചുവിട്ടത് ഒരു വിമാനറാഞ്ചൽ നടപടിയായി കരുതുന്നില്ലെന്ന് ഇസ്രായേൽ പ്രധാനമന്ത്രിയുടെ ഓഫീസ് വക്താവ് വ്യക്തമാക്കിയിരുന്നു. അപകട മുന്നറിയിപ്പ് സന്ദേശം അയച്ച വിമാനം സൗദിയിലെ തബൂക്ക് വിമാനത്താവളത്തിന് സമീപം അടിയന്തരമായി ലാൻഡ് ചെയ്യുകയായിരുന്നു.
സംഭവത്തിന് തൊട്ടുപിന്നാലെ വിമാനം റാഞ്ചിയെന്നത് സൂചിപ്പിക്കുന്ന പ്രത്യേക എമർജൻസി കോഡ് സജീവമാക്കുകയും സന്ദേശം കൈമാറുകയും ചെയ്തിരുന്നതായി ആർമി റേഡിയോ റിപ്പോർട്ട് ചെയ്തു. ഇതിന് പിന്നാലെ പ്രധാനമന്ത്രി ബെഞ്ചമിൻ നെതന്യാഹു പ്രതിരോധ ഉദ്യോഗസ്ഥരെ വിളിച്ച് ഉന്നതതല സുരക്ഷാ അവലോകന യോഗം ചേർന്നതായി ഇസ്രായേൽ മാധ്യമങ്ങൾ പുറത്തുവിട്ടു. ഇസ്രായേൽ വ്യോമസേന സംഭവസ്ഥലത്തേക്ക് യുദ്ധവിമാനങ്ങൾ അയച്ചതായും സൂചനകളുണ്ടായിരുന്നു. ദുബായ് രാജ്യാന്തര വിമാനത്താവളത്തിൽ നിന്ന് ബെൻ ഗുരിയോൺ വിമാനത്താവളത്തിലേക്ക് തിരിച്ച ബോയിംഗ് 737MAX8 ഫ്ലൈറ്റാണ് തബൂക്കിലിറക്കിയത്. വിമാനത്തിന്റെ നിയന്ത്രണം മറ്റൊരാളുടെ കൈകളിലായെന്ന് വ്യക്തമാക്കുന്ന 7500 എന്ന കോഡ് നൽകിയതോടെയാണ് ഹൈജാക്കിംഗ് സംശയങ്ങൾ പരന്നത്. തുടർന്നാണ് കോ-പൈലറ്റ് നടത്തിയ അക്രമത്തിന്റെ ഞെട്ടിക്കുന്ന കൂടുതൽ വിവരങ്ങൾ പുറത്തുവന്നത്.
