ന്യൂയോർക്ക്: അമേരിക്ക വീണ്ടുമൊരു യുദ്ധത്തിലേക്ക് നീങ്ങിയാൽ അതിനെ സർവ്വ സന്നാഹങ്ങളോടെയും നേരിടാൻ ഇറാൻ പൂർണ്ണ സജ്ജമാണെന്ന് വിദേശകാര്യ മന്ത്രി അബ്ബാസ് അരഗ്ചി. ഒരു സമ്പൂർണ്ണ നാശത്തിലേക്ക് നയിക്കുന്ന യുദ്ധസാഹചര്യമുണ്ടായാൽ പോലും ഏതൊരു പുതിയ അധിനിവേശത്തെയും ശക്തമായി ചെറുത്തുതോൽപ്പിക്കാൻ രാജ്യം തയ്യാറാണെന്ന് അരഗ്ചി വ്യക്തമാക്കി. അമേരിക്കയുമായി സമാധാനാന്തരീക്ഷം പുനഃസ്ഥാപിക്കാനുള്ള ശ്രമങ്ങളുടെ ഭാഗമായാണ് താനും ഇറാൻ പ്രസിഡന്റും ന്യൂയോർക്കിൽ എത്തിയിരിക്കുന്നതെന്നും അദ്ദേഹം വിശദീകരിച്ചു.
യുദ്ധം പൂർണ്ണമായി അവസാനിക്കുന്നത് വരെ ഹോർമുസ് കടലിടുക്കിലെ ഗതാഗതം അടച്ചിടുമെന്ന നിലപാടിലാണ് ഇറാൻ ഇപ്പോഴുമുള്ളത്. പോരാട്ടത്തിൽ രാജ്യം വിജയം വരിച്ചുകഴിഞ്ഞുവെങ്കിലും ആ വിജയം പൂർണ്ണമായും ഉറപ്പുവരുത്തേണ്ടതുണ്ടെന്ന് ഇറാൻ സൈനിക ജനറൽ അഭിപ്രായപ്പെട്ടു.
അതിനിടെ, ഈ ആഴ്ചയിൽത്തന്നെ ഇറാനുമായി കൂടുതൽ നയതന്ത്ര ചർച്ചകൾ നടക്കുമെന്ന് പ്രതീക്ഷിക്കുന്നതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചു. യുദ്ധത്തിൽ അമേരിക്ക അതിവേഗം വിജയം നേടുമെന്നും ട്രംപ് കൂട്ടിച്ചേർത്തു.
അതേസമയം, യുഎസിന്റെ അണ്ടർവാട്ടർ ഡ്രോൺ തങ്ങൾ പിടിച്ചെടുത്തുവെന്ന ഇറാന്റെ അവകാശവാദം വാസ്തവവിരുദ്ധമാണെന്ന് അമേരിക്ക ഔദ്യോഗികമായി അറിയിച്ചു. തങ്ങളുടെ എല്ലാ അണ്ടർവാട്ടർ ഡ്രോണുകളും സുരക്ഷിതമാണെന്ന് യുഎസ് സൈന്യം വ്യക്തമാക്കി. എന്നാൽ യുഎസ് ഡ്രോൺ പിടിച്ചെടുത്തുവെന്ന കാര്യത്തിൽ ഉറച്ചുനിൽക്കുകയാണ് ഇസ്ലാമിക് റെവല്യൂഷണറി ഗാർഡ് (ഐആർജിസി). പിടിച്ചെടുത്ത അണ്ടർവാട്ടർ ഡ്രോണിന്റെ ദൃശ്യങ്ങൾ ഇറാൻ സൈനിക ഉദ്യോഗസ്ഥൻ പുറത്തുവിടുകയും ചെയ്തു.
