ന്യൂയോർക്ക്: അമേരിക്ക ആവശ്യമായ വ്യവസ്ഥകൾ പാലിക്കാൻ തയ്യാറായാൽ ഒരാഴ്ചയ്ക്കുള്ളിൽ ഹോർമുസ് കടലിടുക്കിലൂടെയുള്ള കപ്പൽ ഗതാഗതം പുനരാരംഭിക്കാൻ സാധ്യമാകുന്ന നിർദ്ദേശം സമർപ്പിച്ചതായി ഇറാൻ വിദേശകാര്യ മന്ത്രി അബ്ബാസ് അരാഗ്ചി. ന്യൂയോർക്കിലെ ഐക്യരാഷ്ട്ര സഭാ ആസ്ഥാനത്ത് മാധ്യമപ്രവർത്തകരോട് സംസാരിക്കവെയായിരുന്നു അദ്ദേഹത്തിന്റെ ഈ സുപ്രധാന വെളിപ്പെടുത്തൽ. കഴിഞ്ഞ ജൂണിൽ ഒപ്പുവെച്ച ധാരണാപത്രത്തിൽ (MOU) ഇതിനാവശ്യമായ നിബന്ധനകൾ ഉൾപ്പെടുത്തിയിട്ടുണ്ടെന്നും അദ്ദേഹം വ്യക്തമാക്കി.
നിർദ്ദിഷ്ട ഉപാധികൾ യുഎസ് അംഗീകരിച്ചാൽ ഏഴ് ദിവസത്തിനകം കടലിടുക്ക് പൂർണ്ണമായി തുറക്കാനും സമുദ്രവ്യാപാരം സാധാരണ നിലയിലാക്കാനും സാധിക്കും. ഖത്തർ മുഖേനയാണ് ഈ നിർദ്ദേശം അമേരിക്കയ്ക്ക് കൈമാറിയതെന്നും ഇനി അന്തിമ തീരുമാനം എടുക്കേണ്ടത് അവരാണെന്നും അരാഗ്ചി ചൂണ്ടിക്കാട്ടി. അതേസമയം, വാഷിംഗ്ടൺ സ്വീകരിക്കേണ്ട നടപടികൾ എന്തൊക്കെയാണെന്ന് അദ്ദേഹം വിശദമായി വെളിപ്പെടുത്തിയില്ല. യുഎസ് നടപ്പാക്കേണ്ട കാര്യങ്ങൾ പുതിയതല്ലെന്നും അവ നേരത്തെ തന്നെ മുൻ ധാരണാപത്രത്തിൽ ഉള്ളതാണെന്നും അദ്ദേഹം ഓർമ്മിപ്പിച്ചു. കടലിടുക്ക് വീണ്ടും തുറക്കുന്നതിലും ഒരു കരാറിലെത്തുന്നതിലും അമേരിക്കയ്ക്ക് ആത്മാർത്ഥതയുണ്ടെങ്കിൽ അതിനായുള്ള എല്ലാ ക്രമീകരണങ്ങളും ഇപ്പോൾ സജ്ജമാണെന്നും അരാഗ്ചി കൂട്ടിച്ചേർത്തു. എന്നാൽ, ഹോർമുസ് കടലിടുക്കിന്റെ പൂർണ്ണ നിയന്ത്രണം തങ്ങളുടെ പക്കലാണെന്നും അതിനാൽ ഇക്കാര്യത്തിൽ തിടുക്കമില്ലെന്നുമാണ് ഒരു അമേരിക്കൻ ഉദ്യോഗസ്ഥനെ ഉദ്ധരിച്ച് ബിബിസി റിപ്പോർട്ട് ചെയ്തത്.
ഇറാനുമായി ഇതുവരെ രൂപപ്പെടാത്ത സമഗ്ര കരാർ നവംബറിൽ നടക്കുന്ന തെരഞ്ഞെടുപ്പിനു ശേഷം യാഥാർത്ഥ്യമാകുമെന്ന് പ്രതീക്ഷിക്കുന്നതായി യുഎൻ പൊതുസഭയെ അഭിസംബോധന ചെയ്യവെ യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കിയിരുന്നു. ഇറാനെ പുനർനിർമ്മിച്ച് മുൻപത്തേക്കാൾ ശക്തമായ രാജ്യമാക്കാൻ അനുവദിക്കുന്ന ഒരു ഉടമ്പടി ഉണ്ടാകുമോ, അതോ താൻ ഈ ഇസ്ലാമിക് റിപ്പബ്ലിക്കിനെ പൂർണ്ണമായി തകർക്കുമോ എന്നായിരുന്നു ട്രംപിന്റെ ചോദ്യം. മറ്റ് രാജ്യങ്ങളെയും ജനങ്ങളെയും വീണ്ടും ആക്രമിക്കാനും കൊല്ലാനും അവർക്ക് ഇടനൽകാതെ അതിവേഗം നടപടിയെടുക്കുമോ, അതോ അവരെ നരകത്തിലേക്ക് തള്ളുമോ എന്നും ട്രംപ് പരാമർശിച്ചിരുന്നു. എന്നാൽ, യാതൊരുവിധ സമ്മർദ്ദങ്ങൾക്കോ ഭീഷണികൾക്കോ ഭയപ്പെടുത്തലുകൾക്കോ ഇറാൻ കീഴടങ്ങില്ലെന്ന് അബ്ബാസ് അരാഗ്ചി തിരിച്ചടിച്ചു. സമ്പൂർണ്ണ നാശത്തിന്റെ ഭീഷണികൾ മുഴക്കിക്കൊണ്ട് ഒരിക്കലും സമാധാനം സ്ഥാപിക്കാൻ കഴിയില്ലെന്നും അദ്ദേഹം ഓർമ്മിപ്പിച്ചു.
ജൂൺ 18-ന് അമേരിക്കയും ഇറാനും ഒപ്പുവെച്ച ധാരണാപത്രം പ്രധാനമായും വെടിനിർത്തലിനും ഹോർമുസ് കടലിടുക്ക് ഭാഗികമായി തുറക്കുന്നതിനുമുള്ള നീക്കങ്ങളെ മുൻനിർത്തിയുള്ളതായിരുന്നു. 14 നിബന്ധനകളടങ്ങിയ ഈ ഉടമ്പടിയിൽ ഇറാൻ ആണവായുധം നിർമ്മിക്കില്ലെന്ന് ഉറപ്പുനൽകിയിരുന്നു. ഒപ്പം ഇരുരാജ്യങ്ങളും സഖ്യകക്ഷികളും എല്ലാ മേഖലകളിലെയും സൈനിക നീക്കങ്ങൾ അവസാനിപ്പിക്കണമെന്നും യുഎസ് ഏർപ്പെടുത്തിയ നാവിക ഉപരോധം പിൻവലിക്കലും മറ്റ് ഉപരോധങ്ങളിൽ ഇളവുകൾ നൽകലും ഉൾപ്പെട്ടിരുന്നു. വാണിജ്യ കപ്പലുകൾക്ക് സുരക്ഷിത പാത ഉറപ്പാക്കാൻ നടപടിയെടുക്കുമെന്നും ഭാവി കപ്പൽ ഗതാഗത ക്രമീകരണങ്ങളെക്കുറിച്ച് ഒമാനുമായി ചർച്ച നടത്തുമെന്നും ഇറാൻ വ്യക്തമാക്കിയിരുന്നുവെങ്കിലും, തൊട്ടുപിന്നാലെ ഇരുപക്ഷത്തുനിന്നും വീണ്ടും ആക്രമണങ്ങൾ ആരംഭിച്ചതോടെ ഈ കരാർ പരാജയപ്പെടുകയായിരുന്നു.
അതേസമയം, മക്ക സംയുക്ത കരാറിലെ പങ്കാളികളായ സൗദി അറേബ്യ, പാകിസ്താൻ, തുർക്കി എന്നീ രാജ്യങ്ങളിലെ സൈനിക തലവന്മാർ അടിയന്തര യോഗം ചേർന്നു. സൗദിക്കെതിരെ ഹൂതി വിമതരുടെ ആക്രമണം അതിശക്തമായ പശ്ചാത്തലത്തിലാണ് ഈ കൂടിക്കാഴ്ച നടന്നത്. യോഗത്തിന് പിന്നാലെ പാകിസ്താൻ പ്രതിരോധ സേനാ മേധാവി ഫീൽഡ് മാർഷൽ അസിം മുനീറുമായി സൗദി പ്രതിരോധ മന്ത്രി പ്രിൻസ് ഖാലിദ് ബിൻ സൽമാൻ ചർച്ച നടത്തി. സംയുക്ത യോഗത്തിലെ തീരുമാനങ്ങളെ സ്വാഗതം ചെയ്യുന്നതായും വിശുദ്ധ മക്ക നഗരത്തെയും സൗദിയിലെ പൗര-സാമ്പത്തിക കേന്ദ്രങ്ങളെയും ലക്ഷ്യമിട്ടുള്ള ക്രൂരമായ ആക്രമണങ്ങളെക്കുറിച്ച് ചർച്ച ചെയ്തതായും പ്രിൻസ് ഖാലിദ് എക്സ് പോസ്റ്റിൽ കുറിച്ചു. നിലവിലെ കരാറിലെ വ്യവസ്ഥകൾ പ്രകാരം ഇത്തരം ആക്രമണങ്ങളെ ചെറുക്കാനുള്ള കൂട്ടായ നീക്കങ്ങൾ തുടരുമെന്നും അദ്ദേഹം വ്യക്തമാക്കി.
