സാൻഫ്രാൻസിസ്കോ: മെറ്റയിലെ 14 വർഷത്തെ ഔദ്യോഗിക ജീവിതം അവസാനിപ്പിച്ച് എഐ, റോബോട്ടിക്സ് അധിഷ്ഠിത മെഡിസിൻ റിസർച്ച് സ്റ്റാർട്ടപ്പുമായി ഐഐഐടി ഹൈദരാബാദ് പൂർവ്വവിദ്യാർത്ഥി മനോഹർ പലൂരി. കോ-ഫൗണ്ടറും ചീഫ് ടെക്നോളജി ഓഫീസറുമായി അദ്ദേഹം തുടക്കമിട്ട 'വാർപ്പ് സയൻസസ്' (Warp Sciences) എന്ന സംരംഭം ഇതിനകം 215 മില്യൺ ഡോളർ നിക്ഷേപം സമാഹരിച്ചുകഴിഞ്ഞു. മരുന്ന് കണ്ടെത്തൽ പ്രക്രിയ വേഗത്തിലാക്കാൻ ബയോടെക്നോളജി, ഫാർമസ്യൂട്ടിക്കൽ ഗവേഷണങ്ങളിൽ നിർമ്മിതബുദ്ധിയും റോബോട്ടിക്സ് സാങ്കേതികവിദ്യയും പ്രയോജനപ്പെടുത്തുകയാണ് സ്റ്റാർട്ടപ്പിന്റെ ലക്ഷ്യം.
2006-ൽ ഐഐഐടി ഹൈദരാബാദിൽ നിന്ന് കമ്പ്യൂട്ടർ സയൻസിൽ ബി.ടെക് പൂർത്തിയാക്കിയ പലൂരി, സർനോഫ് ഇന്നൊവേറ്റീവ് ടെക്നോളജിയിലാണ് കരിയർ ആരംഭിച്ചത്. പിന്നീട് യുഎസിലെ ജോർജിയ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ ഉപരിപഠനം നടത്തിയ അദ്ദേഹം ഐബിഎം വാട്സൺ ലാബ്സ്, ഗൂഗിൾ എന്നിവിടങ്ങളിൽ 3D മാപ്പിങ് അടക്കമുള്ള മേഖലകളിൽ റിസർച്ച് ഇന്റേണായി പ്രവർത്തിച്ചു.
2012-ൽ കമ്പ്യൂട്ടർ വിഷൻ റിസർച്ചറായി ഫേസ്ബുക്കിൽ (ഇപ്പോഴത്തെ മെറ്റ) ചേർന്ന പലൂരി, ഘട്ടങ്ങളായി ഉയർന്ന പദവികളിലെത്തി. 2015-ൽ ആർട്ടിഫിഷ്യൽ ഇന്റലിജൻസ് ഡയറക്ടറായും 2021-ൽ സീനിയർ ഡയറക്ടറായും ചുമതല വഹിച്ച അദ്ദേഹം, 2024-ലാണ് മെറ്റയുടെ എഐ വൈസ് പ്രസിഡന്റ് പദവിയിലെത്തുന്നത്. നീണ്ട പരീക്ഷണങ്ങളും ലബോറട്ടറി പരിശോധനകളും ആവശ്യമുള്ള മരുന്ന് കണ്ടെത്തൽ പ്രക്രിയ റോബോട്ടിക്സും എഐയും ഉപയോഗിച്ച് കൂടുതൽ വേഗത്തിലാക്കുകയാണ് പുതിയ സംരംഭത്തിലൂടെ അദ്ദേഹം ലക്ഷ്യമിടുന്നത്.
