ഡബ്ലിൻ: അടുത്ത വർഷത്തോടെ വലിയ തോതിലുള്ള എഐ ഹാക്കിങ് ഭീഷണികൾ ഉണ്ടായേക്കാമെന്ന് ഗൂഗിൾ ഡീപ്മൈൻഡ് സഹസ്ഥാപകൻ ഡെമിസ് ഹസാബിസ്. നിലവിലെ സാങ്കേതികവിദ്യകൾ അത്രകണ്ട് ശക്തമല്ലാത്തതിനാൽ ഇപ്പോൾ നടക്കുന്ന സൈബർ ആക്രമണങ്ങൾ വരാനിരിക്കുന്ന വൻ ഭീഷണികളുടെ പ്രാരംഭ മുന്നറിയിപ്പുകൾ മാത്രമാണെന്നും, കമ്പനികളും സർക്കാരുകളും പ്രതിരോധ നടപടികൾ ശക്തമാക്കിയില്ലെങ്കിൽ ഏതാനും വർഷങ്ങൾക്കുള്ളിൽ കാര്യങ്ങൾ കൈവിട്ടുപോകുമെന്നും ഡബ്ലിനിൽ നടന്ന എഐ ഉച്ചകോടിയിൽ സംസാരിക്കവെ അദ്ദേഹം വ്യക്തമാക്കി.
ഓപ്പൺഎഐ-ഹഗ്ഗിങ് ഫെയ്സ് സംഭവം, യുഎസിലെയും ഓസ്‌ട്രേലിയയിലെയും സർക്കാർ പോർട്ടലുകൾക്ക് നേരെയുണ്ടായ എഐ അധിഷ്ഠിത ഹാക്കിങ്ങുകൾ എന്നിവയ്ക്ക് പുറമെ, ആന്ത്രോപിക്കിന്റെ എഐ മോഡൽ നിയമപാലകർക്ക് വ്യാജ കൊലപാതക വിവരം നൽകിയ സംഭവവും സ്വയം പ്രവർത്തിക്കാൻ ശേഷിയുള്ള എഐ സംവിധാനങ്ങൾ ഉയർത്തുന്ന അപകടങ്ങളുടെ വ്യാപ്തി വെളിപ്പെടുത്തുന്നതായി ചൂണ്ടിക്കാണിക്കപ്പെട്ടു. ന്യൂക്ലിയർ സാങ്കേതികവിദ്യ, ബയോളജി തുടങ്ങിയ അതീവ സുരക്ഷാ മേഖലകളിലെ മാനദണ്ഡങ്ങൾ മാതൃകയാക്കി എഐ സംവിധാനങ്ങൾക്കായി അന്താരാഷ്ട്ര സുരക്ഷാ ചട്ടക്കൂടും സർട്ടിഫിക്കേഷൻ പ്രക്രിയയും രൂപീകരിക്കണമെന്നും ഹസാബിസ് ആവശ്യപ്പെട്ടു.
എഐ നിയന്ത്രണങ്ങളോടുള്ള സാങ്കേതിക വ്യവസായ മേഖലയുടെ വിമുഖത മാറണമെന്ന് ഉച്ചകോടിയിൽ പങ്കെടുത്ത മൈക്രോസോഫ്റ്റ് പ്രസിഡന്റ് ബ്രാഡ് സ്മിത്ത് ചൂണ്ടിക്കാട്ടി. വഴിവിട്ടു സഞ്ചരിക്കുന്ന എഐ പ്രവർത്തനങ്ങളുടെ പശ്ചാത്തലത്തിൽ 2026 ഒരു 'ഓർമ്മപ്പെടുത്തലിന്റെ വർഷ'മാണെന്ന് വിശേഷിപ്പിച്ച അദ്ദേഹം, ഒരു കമ്പനിയോ സാങ്കേതികവിദ്യയോ നിയമത്തിന് അതീതരല്ലെന്നും പൊതു മേൽനോട്ടവും സന്തുലിതമായ നിയമനിർമ്മാണങ്ങളും അനിവാര്യമാണെന്നും റോയിട്ടേഴ്സ് റിപ്പോർട്ട് ചെയ്ത പ്രസ്താവനയിൽ വ്യക്തമാക്കി.
