സാൻ ജോസ് (കാലിഫോർണിയ): വിപണിയിൽ പുറത്തിറങ്ങാത്ത പുതിയ ഹാർഡ്‌വെയർ ഉപകരണവുമായി ബന്ധപ്പെട്ട അതീവ രഹസ്യ രേഖകൾ മുൻ ജീവനക്കാരൻ മോഷ്ടിച്ച് ആപ്പിളിന്റെ ഉന്നത നേതൃത്വത്തിന് കൈമാറിയെന്ന ഗുരുതര ആരോപണവുമായി ഓപ്പൺഎഐ. ആപ്പിളും ഓപ്പൺഎഐയും തമ്മിൽ നിലനിൽക്കുന്ന കോർപ്പറേറ്റ് ചാരവൃത്തി തർക്കത്തിനിടെ, 2026 ഒക്ടോബർ 14-ന് സാൻ ജോസ് കോടതിയിൽ സമർപ്പിച്ച പുതിയ രേഖകളിലാണ് ചാറ്റ്ജിപിടിയുടെ നിർമ്മാതാക്കൾ ഈ പരാതി ഉന്നയിച്ചിരിക്കുന്നത്.

ആറുമാസം മാത്രം ഓപ്പൺഎഐയിൽ ജോലി ചെയ്ത ഈ വ്യക്തി, തന്റെ അവസാന പ്രവൃത്തിദിനമായ 2026 ജൂൺ രണ്ടിന് അർദ്ധരാത്രിക്ക് ശേഷം നൂറിലധികം അതീവ രഹസ്യ ഫയലുകൾ വ്യക്തിഗത അക്കൗണ്ടുകളിലേക്ക് മാറ്റിയെന്നാണ് ആരോപണം. നിർമ്മാണത്തിലിരിക്കുന്ന ഹാർഡ്‌വെയറിന്റെ ചിത്രങ്ങൾ, എഞ്ചിനീയറിംഗ്-നിർമ്മാണ വിവരങ്ങൾ, സപ്ലയർ പ്രോജക്ട് രേഖകൾ, ഫിനിഷിംഗ്-സീലിംഗ് മാനദണ്ഡങ്ങൾ എന്നിവയടങ്ങിയ ഈ വിവരങ്ങൾ ആപ്പിളിന്റെ ഏഷ്യയിലെ ഓപ്പറേഷൻസ് വൈസ് പ്രസിഡന്റ് ഉൾപ്പെടെയുള്ള ഉന്നതർക്ക് മുന്നിൽ ഇയാൾ അവതരിപ്പിച്ചതായും ഓപ്പൺഎഐ അവകാശപ്പെടുന്നു. ആപ്പിൾ അടുത്തിടെ വിപണിയിലെത്തിച്ച 'ഹോംവ്യൂ' എന്ന എഐ അധിഷ്ഠിത സ്മാർട്ട് ഹോം ഉപകരണത്തിന് പിന്നിൽ തങ്ങളുടെ വ്യാപാര രഹസ്യങ്ങൾ ഉപയോഗിച്ചിട്ടുണ്ടോ എന്ന ആശങ്കയും കമ്പനി പങ്കുവെച്ചു.

എന്നാൽ ആരോപണങ്ങളെല്ലാം ആപ്പിൾ പൂർണ്ണമായും തള്ളി. ഫയലുകൾ മാറ്റാൻ ഉപയോഗിച്ച ഫോൺ നമ്പറുകൾ ജീവനക്കാരന്റെ ആപ്പിളിലെ ഔദ്യോഗിക പ്രവർത്തനങ്ങളുമായി ബന്ധപ്പെട്ടതല്ലെന്നും, ആന്തരിക അന്വേഷണത്തിൽ ഇത്തരം ഫയലുകൾ സിസ്റ്റത്തിൽ എത്തിയതായി തെളിവുകളില്ലെന്നും ഒക്ടോബർ 12-ന് അയച്ച കത്തിൽ ആപ്പിൾ വ്യക്തമാക്കി. നേരത്തെ, തങ്ങളുടെ മുൻ ജീവനക്കാർ ഓപ്പൺഎഐയുടെ ഹാർഡ്‌വെയർ വിഭാഗത്തിലേക്ക് രഹസ്യ വിവരങ്ങൾ ചോർത്തിയെന്ന് ആപ്പിളും പരാതിപ്പെട്ടിരുന്നു.

കേസിൽ യുഎസ് ഡിസ്ട്രിക്റ്റ് കോടതി ജഡ്ജി എഡ്വേർഡ് ഡാവില, ആപ്പിളിന്റെ മുൻ പ്രൊഡക്ട് ഡിസൈൻ വൈസ് പ്രസിഡന്റ് ടാങ് യേവ് ടാൻ, മുൻ സീനിയർ സിസ്റ്റംസ് ഇലക്ട്രിക്കൽ എഞ്ചിനീയർ ചാങ് ലിയു എന്നിവരുൾപ്പെടെ മൂന്ന് മുൻ ജീവനക്കാരെ വേഗത്തിൽ ചോദ്യം ചെയ്യാൻ ആപ്പിളിന് അനുമതി നൽകിയിട്ടുണ്ട്. കേസിന്റെ പൂർണ്ണമായ വിചാരണ 2027 ഒക്ടോബറിൽ നടക്കാനിരിക്കെ, 2027 ജൂണിൽ തന്നെ വിചാരണയ്ക്ക് തയ്യാറാണെന്ന് ഓപ്പൺഎഐ കോടതിയെ അറിയിച്ചിട്ടുണ്ട്.