സാൻ ഫ്രാൻസിസ്കോ: ഓപ്പൺഎഐയുടെ എക്സിക്യൂട്ടീവ് കോൺഫറൻസ് മുറിക്കുള്ളിൽ രഹസ്യ വിവരങ്ങൾ ചോർത്താനായി നിരീക്ഷണ ഉപകരണം ഘടിപ്പിച്ച കമ്പനിയിലെ എൻജിനീയറും സൗദി പൗരനുമായ അബ്ദുൾറഹ്മാൻ അൽഫോസാനെ (35) എഫ്ബിഐ അറസ്റ്റ് ചെയ്തു. കമ്പനിയിലെ നിരീക്ഷണ പരിശോധനകൾക്കിടെ കണ്ടെത്തിയ ഈ ഉപകരണത്തിന്റെ ഉറവിടം കണ്ടെത്താൻ സ്വന്തം എഐ മോഡലുകളാണ് ഓപ്പൺഎഐ ഉപയോഗിച്ചത്; തുടർന്ന് നടത്തിയ അന്വേഷണത്തിലാണ് മുൻ ജീവനക്കാരനായ അൽഫോസാനാണ് ഇതിന് പിന്നിലെന്ന് തിരിച്ചറിഞ്ഞതും വിവരം എഫ്ബിഐക്ക് കൈമാറിയതും.

സെപ്റ്റംബർ 30-ന് നടത്തിയ സുരക്ഷാ പരിശോധനയിലാണ് സാൻ ഫ്രാൻസിസ്കോ ഓഫീസിലെ കോൺഫറൻസ് റൂം ടിവിയുടെ പിന്നിലുള്ള യുഎസ്ബി പോർട്ടിൽ ടോയ്‌ലറ്റ് പേപ്പറിൽ പൊതിഞ്ഞ നിലയിൽ തള്ളവിരലിന്റെ വലിപ്പമുള്ള ഈ ഉപകരണം കണ്ടെത്തിയത്. മൈക്രോഫോൺ, വേർപെടുത്താവുന്ന ക്യാമറ സെൻസർ, മൈക്രോ എസ്ഡി സ്റ്റോറേജ് എന്നിവ ഉൾക്കൊള്ളുന്നതായിരുന്നു ഈ ഉപകരണം; സെപ്റ്റംബർ 28-നാണ് ഇത് സ്ഥാപിച്ചതെന്ന് വ്യക്തമായെങ്കിലും ഇതിലെ വിവരങ്ങൾ എൻക്രിപ്റ്റ് ചെയ്തിരുന്നതിനാൽ കമ്പനിക്ക് വായിച്ചെടുക്കാൻ സാധിച്ചില്ല.

കമ്പനിയുടെ  എഐ സാങ്കേതികവിദ്യയുമായി ബന്ധപ്പെട്ട തന്ത്രപ്രധാന ആശയവിനിമയങ്ങൾ ചോർത്തുകയായിരുന്നു പ്രതിയുടെ ലക്ഷ്യമെന്ന് യുഎസ് നീതിന്യായ വകുപ്പ് വ്യക്തമാക്കി. യുഎസ് സ്ഥിരതാമസക്കാരനും 2025 ജൂലൈയിൽ ഓപ്പൺഎഐയിൽ ചേർന്നതുമായ അൽഫോസാനെ ഒക്ടോബർ 9-നാണ് അറസ്റ്റ് ചെയ്തത്; തുടർന്ന് ചൊവ്വാഴ്ച ഫെഡറൽ കോടതിയിൽ ഹാജരാക്കിയ ഇയാൾക്കെതിരെയുള്ള കുറ്റങ്ങൾ തെളിയിക്കപ്പെട്ടാൽ അഞ്ച് വർഷം വരെ തടവും 2,50,000 ഡോളർ (ഏകദേശം 2.37 കോടി രൂപ) പിഴയും മൂന്ന് വർഷത്തെ നിരീക്ഷണ കാലാവധിയും ലഭിക്കാം.