വാഷിങ്ടൺ: കുട്ടികൾക്കും കൗമാരക്കാർക്കും ചാറ്റ്ജിപിടി ഗുരുതരമായ മാനസിക-ശാരീരിക ഭീഷണിയുയർത്തുന്നുവെന്ന് ചൂണ്ടിക്കാട്ടി ആർട്ടിഫിഷ്യൽ ഇന്റലിജൻസ് കമ്പനിയായ ഓപ്പൺഎഐക്കെതിരെ യുഎസിലെ എട്ട് സംസ്ഥാനങ്ങൾ സംയുക്തമായി നിയമനടപടി സ്വീകരിച്ചു. സുരക്ഷിതമെന്ന പേരിൽ മാതാപിതാക്കളെ കമ്പനി തെറ്റിദ്ധരിപ്പിച്ചെന്നും, അപകടകരമായ പെരുമാറ്റങ്ങൾക്ക് കുട്ടികളെ പ്രേരിപ്പിച്ച് വലിയ തോതിൽ ദ്രോഹിക്കുകയാണെന്നും ആരോപിച്ച് അയോവ, കൻസാസ്, അരിസോണ, അർക്കൻസാസ്, ഇഡാഹോ, മൊണ്ടാന, നെബ്രാസ്ക, വെസ്റ്റ് വിർജീനിയ എന്നീ സംസ്ഥാനങ്ങളാണ് അതത് കോടതികളിൽ കേസുകൾ ഫയൽ ചെയ്തത്. ഒരു എഐ കമ്പനിക്കെതിരെ ഇത്രയധികം സംസ്ഥാനങ്ങൾ ഒന്നിച്ച് രംഗത്തെത്തുന്നത് ഇതാദ്യമാണ്.
ഉപഭോക്താക്കളോട് അമിതമായി ഇണങ്ങിച്ചേരുന്ന ഒരു ആത്മാർത്ഥ സുഹൃത്തിനെപ്പോലെ പെരുമാറാൻ പ്രോഗ്രാം ചെയ്യപ്പെട്ടിട്ടുള്ള ചാറ്റ്ജിപിടി, കുട്ടികളെ വഴിതെറ്റിക്കുകയും അവരിൽ ഒരു വ്യാജ വൈകാരിക ബന്ധം സൃഷ്ടിക്കുകയും ചെയ്യുന്നുവെന്നാണ് പ്രധാന ആരോപണം.
ചാറ്റ്ജിപിടി കുട്ടികൾക്ക് ആപത്താണെന്ന് പരസ്യമായി കുറ്റപ്പെടുത്തിയ അയോവ അറ്റോർണി ജനറൽ ബ്രെന്നാ ബേർഡ്, അപകടകരമായ വൈദ്യോപദേശങ്ങൾ നൽകുന്നതിനൊപ്പം മറ്റുള്ളവരെ ഉപദ്രവിക്കാനും ആത്മഹത്യ ചെയ്യാനും വരെ ഈ വ്യാജസുഹൃത്ത് ഉപയോക്താക്കളെ പ്രേരിപ്പിക്കുന്നുണ്ടെന്ന് വ്യക്തമാക്കി.
