ക്രിസ്റ്റ്യാനോ റൊണാൾഡോയുമായുള്ള തർക്കത്തിൽ പോർച്ചുഗൽ ദേശീയ ടീം കോച്ച് ജോർജ് ജീസസിനെതിരെ അച്ചടക്ക നടപടിയുണ്ടായേക്കുമെന്ന് റിപ്പോർട്ട്. ടീമിനെ നയിക്കുന്ന താരത്തോട് പരിശീലകൻ പക്വതയില്ലാതെയാണ് പെരുമാറിയതെന്നും മുതിർന്ന ഒരു പരിശീലകനിൽ നിന്നും കളിക്കാരനിൽ നിന്നും ഇത്തരം അനുചിതമായ പെരുമാറ്റം ഉണ്ടാകാൻ പാടില്ലായിരുന്നുവെന്നും പോർച്ചുഗീസ് ഫുട്ബോൾ അതോറിറ്റി നിരീക്ഷിച്ചതായി പോർച്ചുഗീസ് മാധ്യമങ്ങൾ വ്യക്തമാക്കുന്നു. ഔപചാരിക പരാതി ലഭിച്ചാൽ മാത്രമേ ജീസസിന്റെ നടപടികൾ അവലോകനം ചെയ്ത് തീരുമാനമെടുക്കൂ.
യുവേഫ നേഷൻസ് ലീഗിൽ ഡെന്മാർക്കിനെതിരായ മത്സരത്തിന് മുന്നോടിയായി കോപ്പൻഹേഗനിലെ പരിശീലന ക്യാമ്പിലാണ് വിവാദങ്ങൾക്ക് തുടക്കമായത്. റൊണാൾഡോ സ്ഥിരമായി ധരിക്കുന്ന ഏഴാം നമ്പർ ജഴ്സി യുവതാരം റാഫേൽ ലിയാവോയ്ക്ക് നൽകിയതിനെ തുടർന്നുണ്ടായ തർക്കത്തിനൊടുവിൽ താരം ക്യാമ്പ് വിട്ടിറങ്ങുകയായിരുന്നു.
ഡെന്മാർക്കിനെതിരായ പോരാട്ടത്തിൽ പോർച്ചുഗലിനായി ഏഴാം നമ്പർ ജഴ്സിയണിഞ്ഞ് ഇറങ്ങിയത് റാഫേൽ ലിയാവോ തന്നെയായിരുന്നു. ക്യാമ്പിൽ നിന്നുള്ള റൊണാൾഡോയുടെ അപ്രതീക്ഷിത മടക്കം വലിയ ചർച്ചയായ പശ്ചാത്തലത്തിലാണ് അതോറിറ്റിയുടെ ഇടപെടൽ.
