ഓസ്‌ട്രേലിയയുടെ ദക്ഷിണാഫ്രിക്കൻ പര്യടനത്തിലെ ആദ്യ ടെസ്റ്റ് ആരംഭിച്ചതിന് തൊട്ടുപിന്നാലെ, ഓസീസ് ടീമിനെ പരിഹസിച്ചുകൊണ്ട് തങ്ങളുടെ സ്റ്റോറുകളിൽ നിന്ന് സാൻഡ്‌പേപ്പറുകൾ ഒക്ടോബർ 31 വരെ പിൻവലിച്ച് പ്രമുഖ ദക്ഷിണാഫ്രിക്കൻ സൂപ്പർമാർക്കറ്റ് ശൃംഖലയായ 'പിക്ക് എൻ പേ ഹൈപ്പർമാർക്കറ്റ്'. 2018-ൽ ദക്ഷിണാഫ്രിക്കയിൽ നടന്ന പര്യടനത്തിനിടെ ആസ്ട്രേലിയൻ ടീമിനെ പിടിച്ചുലച്ച പന്ത് ചുരണ്ടൽ വിവാദത്തെ ഓർമിപ്പിച്ചാണ് സൂപ്പർമാർക്കറ്റിന്റെ ഈ നീക്കം.

മൂന്ന് മത്സരങ്ങളടങ്ങിയ ടെസ്റ്റ് പരമ്പരയ്ക്കായി ദക്ഷിണാഫ്രിക്കയിലെത്തിയ ഓസ്‌ട്രേലിയയുടെ ആദ്യ ടെസ്റ്റ് ഒക്ടോബർ 9 വെള്ളിയാഴ്ച ഡർബനിലെ കിംഗ്സ്മീഡിലാണ് തുടങ്ങിയത്. 2018-ലെ പന്ത് ചുരണ്ടൽ വിവാദത്തിനും മൂന്ന് ഓസീസ് താരങ്ങളുടെ വിലക്കിനും ശേഷം ഓസ്‌ട്രേലിയ ദക്ഷിണാഫ്രിക്കയിൽ നടത്തുന്ന ആദ്യ ടെസ്റ്റ് പര്യടനമാണിത്.

2018 മാർച്ചിൽ കേപ് ടൗണിലെ ന്യൂലാൻഡ്സിൽ നടന്ന മൂന്നാം ടെസ്റ്റിനിടെ ഓസ്‌ട്രേലിയൻ ഓപ്പണർ കാമറൂൺ ബാൻക്രോഫ്റ്റ് സാൻഡ്‌പേപ്പർ കഷണം ഉപയോഗിച്ച് പന്തിന്റെ അവസ്ഥയിൽ കൃത്രിമം കാണിക്കാൻ ശ്രമിച്ചതും, തുടർന്ന് അത് ഒളിപ്പിച്ചതും ടെലിവിഷൻ ക്യാമറകൾ ഒപ്പിയെടുക്കുകയായിരുന്നു. ക്രിക്കറ്റ് ഓസ്‌ട്രേലിയയുടെ അന്വേഷണത്തിന് കാരണമായ ഈ സംഭവം ഓസ്‌ട്രേലിയയിൽ വൻ വിവാദമായി മാറുകയും ചെയ്തിരുന്നു.