വെസ്റ്റ് ഇൻഡീസിനെതിരായ ഒന്നാം ട്വന്റി-20യിൽ പ്രതീക്ഷിച്ച പ്രകടനം പുറത്തെടുക്കാൻ കഴിയാതെ പോയ സഞ്ജു സാംസണ് നിർദേശങ്ങളും പിന്തുണയുമായി മുൻ ഇന്ത്യൻ താരം വസീം ജാഫർ രംഗത്ത്. വൈഭവ് സൂര്യവംശി അടക്കമുള്ള താരങ്ങൾ പകരക്കാരായി ബെഞ്ചിലിരിക്കുന്നത് സൃഷ്ടിക്കുന്ന സമ്മർദ്ദം എപ്പോഴും സഞ്ജുവിന് മുകളിലുണ്ടാകുമെന്ന് ജാഫർ ചൂണ്ടിക്കാട്ടി.

മറുഭാഗത്ത് അഭിഷേക് ശർമ്മ തകർത്തടിക്കുമ്പോൾ ടീമിന്റെ റൺറേറ്റ് കുറയില്ലെന്ന കാര്യം സഞ്ജു മനസ്സിലാക്കണമെന്ന് അദ്ദേഹം ഓർമ്മിപ്പിച്ചു. അതിനാൽ ഇന്നിങ്സിന്റെ തുടക്കത്തിൽ അൽപം സമയമെടുത്ത് ക്രീസിൽ നിലയുറപ്പിക്കാനാണ് താരം ശ്രമിക്കേണ്ടത്.

സെലക്ടർമാർക്കോ ടീം മാനേജ്‌മെന്റിനോ തന്നെ ടീമിൽ നിന്ന് ഒഴിവാക്കാൻ പഴുത് നൽകാത്ത വിധം സ്ഥിരതയുള്ള ഇന്നിങ്സുകൾ കാഴ്ചവെക്കാൻ സഞ്ജു ശ്രദ്ധിക്കണമെന്നും ജാഫർ കൂട്ടിച്ചേർത്തു.