തിരുവനന്തപുരം: സംസ്ഥാനത്തെ ഐഎഎസ് ഉദ്യോഗസ്ഥരുടെ തലപ്പത്ത് വീണ്ടും അഴിച്ചുപണി നടത്തി ചീഫ് സെക്രട്ടറി ഉത്തരവിറക്കി. ബാർ ലൈസൻസ് വിവാദങ്ങൾക്കിടെ സീറാം സാംബശിവ റാവുവിനെ മാറ്റി പകരം എസ്. കാർത്തികേയനെ പുതിയ എക്സൈസ് കമ്മീഷണറായി നിയമിച്ചു; സാംബശിവ റാവുവിന് നിലവിൽ അധിക ചുമതലകളൊന്നും നൽകിയിട്ടില്ല.
പുതിയ ഉത്തരവ് പ്രകാരം ശർമിള മേരി ജോസഫ് കെ.ടി.ഡി.എഫ്.സി (KTDFC) ചെയർപേഴ്‌സണായും, ഡി. ബാലമുരളി കെ.എം.എസ്.സി.എൽ (KMSCL) എം.ഡിയായും ചുമതലയേൽക്കും. ജെറോമിക് ജോർജിനെ വിഴിഞ്ഞം തുറമുഖം എം.ഡിയായും, എം.ജി. രാജമാണിക്യത്തെ ഇൻഫർമേഷൻ കേരള മിഷൻ എക്സിക്യൂട്ടീവ് ഡയറക്ടറായും നിയമിച്ചു.
അബ്ദുൾ നാസർ ബി പാർലമെന്റ് അഫയേഴ്‌സ് ഡിപ്പാർട്ട്‌മെന്റ് സ്പെഷ്യൽ സെക്രട്ടറിയാകും. അഫ്‌സാന പർവീൺ ഐ.എ.എസിനെ മിൽമ എം.ഡിയായും, മിഥുൻ പ്രേംരാജിനെ കെ.എസ്.ഐ.ഡി.സി (KSIDC) എക്സിക്യൂട്ടീവ് ഡയറക്ടറായും നിയമിച്ചിട്ടുണ്ട്.
സർക്കാരുമായോ വകുപ്പ് മന്ത്രിയുമായോ കൂടിയാലോചന നടത്താതെ എക്സൈസ് കമ്മീഷണർ സുപ്രധാന തീരുമാനങ്ങൾ കൈക്കൊണ്ടുവെന്ന വിമർശനത്തിന് പിന്നാലെയാണ് സീറാം സാംബശിവ റാവുവിന്റെ സ്ഥാനമാറ്റം. സർക്കാർ അറിഞ്ഞ് തീരുമാനമെടുക്കേണ്ട കാര്യങ്ങളിൽ താഴെത്തട്ടിൽ തീരുമാനമെടുക്കാൻ മുൻ ഇടതുസർക്കാരാണ് അധികാരം നൽകിയതെന്നും, കഴിഞ്ഞ സർക്കാർ സൃഷ്ടിച്ച എല്ലാ പഴുതുകളും അടയ്ക്കുമെന്നും വകുപ്പ് മന്ത്രി വ്യക്തമാക്കിയിരുന്നു.
