വയനാട്: നഷ്ടപരിഹാര പട്ടികയിൽ നിന്ന് ഒഴിവാക്കിയതിനെതിരെ മുണ്ടക്കൈ–ചൂരൽമല ദുരന്തബാധിതരായ വ്യാപാരികൾ പ്രതിഷേധത്തിനൊരുങ്ങുന്നു. ഉപജീവനമാർഗ്ഗം നഷ്ടപ്പെട്ട വ്യാപാരികളിൽ 28 പേരെ മാത്രമാണ് നിലവിലെ പട്ടികയിൽ ഉൾപ്പെടുത്തിയിട്ടുള്ളതെന്നും, ഒഴിവാക്കപ്പെട്ട മുഴുവൻ വ്യാപാരികളെയും ഉൾപ്പെടുത്തി നഷ്ടപരിഹാരം നൽകണമെന്നുമാണ് ഇവരുടെ ആവശ്യം.

പഞ്ചായത്ത് ലൈസൻസ്, കെട്ടിട നമ്പർ, പെർമിറ്റ് എന്നിവയില്ലെന്ന കാരണം ചൂണ്ടിക്കാട്ടിയാണ് ബാക്കിയുള്ള വ്യാപാരികളെ പട്ടികയിൽ നിന്ന് ഒഴിവാക്കിയത്. ദുരന്തസമയത്ത് എല്ലാ വ്യാപാരികൾക്കും സഹായം നൽകുമെന്ന് മുൻ സർക്കാർ ഉറപ്പു നൽകിയിരുന്നതായി വ്യാപാരികൾ ചൂണ്ടിക്കാട്ടുന്നു.

നഷ്ടപരിഹാരം വൈകുന്നതിനെതിരെ വ്യാപാരികളും സമരസമിതികളും പ്രതിഷേധങ്ങളും മുന്നറിയിപ്പുകളും ഉയർത്തിയതിനെ തുടർന്ന്, ഒക്ടോബർ 30-ന് മുഖ്യമന്ത്രിയുടെ ദുരിതാശ്വാസ നിധിയിൽ നിന്നും 7,19,99,400 രൂപ (7.19 കോടി രൂപ) അനുവദിച്ച് സർക്കാർ ഉത്തരവിട്ടിരുന്നു. ഇതിൽ കെട്ടിട ഉടമകളായ 48 പേർക്ക് 5.14 കോടി രൂപയും, ലൈസൻസുള്ള 28 വാണിജ്യ സംരംഭകർക്കും വ്യാപാരികൾക്കുമായി 2.05 കോടി രൂപയുമാണ് വകയിരുത്തിയിരിക്കുന്നത്.