കൊച്ചി: കാലടി സംസ്കൃത സർവകലാശാലയിലെ വിദ്യാർത്ഥി പ്രതിഷേധവുമായി ബന്ധപ്പെട്ട സസ്‌പെൻഷൻ നടപടിയെ ഹൈക്കോടതിയിൽ ന്യായീകരിച്ച് സർവകലാശാല. വിദ്യാർത്ഥികൾ സമർപ്പിച്ച ഹർജിക്ക് മറുപടിയായി നൽകിയ 44 പേജുള്ള എതിർ സത്യവാങ്മൂലത്തിലാണ്, ചെയ്ത തെറ്റിന് മാപ്പപേക്ഷ നൽകിയാൽ വിദ്യാർത്ഥികളെ തിരിച്ചെടുക്കാമെന്ന നിലപാട് സർവകലാശാല ആവർത്തിച്ചത്.
പ്രതിഷേധത്തിനിടെ വൈസ് ചാൻസലറെ തടഞ്ഞുവെച്ച് ആക്രമിക്കുകയും സിൻഡിക്കറ്റ് യോഗം തടസ്സപ്പെടുത്തുകയും ചെയ്ത സംഭവത്തിൽ 16 വിദ്യാർത്ഥികളും കുറ്റക്കാരാണെന്ന് ആഭ്യന്തര അന്വേഷണ സമിതി കണ്ടെത്തിയിട്ടുണ്ട്. ക്യാമ്പസിലെ അച്ചടക്കം ഉറപ്പാക്കാനാണ് നടപടിയെടുത്തതെന്നും, ഇതിന് പിന്നിൽ വ്യക്തിവൈരാഗ്യമില്ലെന്നും സർവകലാശാല കോടതിയെ അറിയിച്ചു.
അക്കാദമിക് അന്തരീക്ഷം തകർക്കുന്ന വിധത്തിലുള്ള പെരുമാറ്റദൂഷ്യമാണ് സസ്‌പെൻഷന് കാരണമായതെന്നും, വിദ്യാർത്ഥികൾ സ്വയം സൃഷ്ടിച്ച പ്രശ്നങ്ങൾ മൂലമാണ് അവർക്ക് ഹാജരും പരീക്ഷയെഴുതാനുള്ള അവസരവും നഷ്ടമായതെന്നും സത്യവാങ്മൂലത്തിൽ പറയുന്നു. സസ്‌പെൻഷനിലായ വിദ്യാർത്ഥികൾക്കെതിരെ മുൻപും അച്ചടക്കനടപടികളും പൊലീസ് കേസുകളും ഉണ്ടായിട്ടുണ്ടെന്നും സർവകലാശാല വ്യക്തമാക്കി.
