തിരുവനന്തപുരം: നിയമനം ആവശ്യപ്പെട്ട് സമരം ചെയ്യുന്ന എൽപിഎസ്ടി ഉദ്യോഗാർത്ഥികളുടെ സമരപ്പന്തൽ പൊളിച്ചുനീക്കിയ സർക്കാർ നടപടിയിൽ മുഖ്യമന്ത്രിക്കെതിരെ പരിഹാസ പ്രതിഷേധവുമായി സി.ജെ.പി രംഗത്തെത്തി. സമരപ്പന്തൽ പൊളിച്ച സംഭവത്തിൽ മുഖ്യമന്ത്രിക്കായി 'കണ്ണീർദാന ക്യാമ്പ്' സംഘടിപ്പിക്കാനാണ് സി.ജെ.പി തീരുമാനിച്ചിരിക്കുന്നത്.
നേരത്തെ വളർമതി മുടി മുറിച്ചപ്പോൾ കണ്ണീരൊഴുക്കിയവർക്ക് സമരപ്പന്തൽ പൊളിച്ചപ്പോൾ കണ്ണീരില്ലാതായോ എന്ന് ചോദിച്ചുകൊണ്ടാണ് സി.ജെ.പി ഫേസ്ബുക്ക് പോസ്റ്റിലൂടെ പ്രതിഷേധം പ്രഖ്യാപിച്ചത്. മുഖ്യമന്ത്രിക്ക് കണ്ണീർ ക്ഷാമമാണെങ്കിൽ സി.ജെ.പി കേരള ഘടകം കണ്ണീർ സംഭാവന ചെയ്യാൻ തയ്യാറാണെന്നും, അധികാരികൾക്കുള്ള ഓർമ്മപ്പെടുത്തലായി കണ്ണീർദാന ക്യാമ്പയിനിൽ എല്ലാവരും പങ്കാളികളാകണമെന്നും പോസ്റ്റിൽ പരിഹസിക്കുന്നു.
എൽപിഎസ്ടി ഉദ്യോഗാർത്ഥികളുടെ ന്യായമായ ആവശ്യങ്ങളിൽ സർക്കാർ അടിയന്തരമായി ഇടപെട്ട് പരിഹാരം കാണണമെന്നാവശ്യപ്പെട്ട് നിരാഹാര സമരം നടത്തുമെന്ന് സി.ജെ.പി കേരള ഘടകം കഴിഞ്ഞ ദിവസം പത്രക്കുറിപ്പിലൂടെ വ്യക്തമാക്കിയിരുന്നു. സമരക്കാർക്ക് നൽകിയ ഉറപ്പുകൾ സർക്കാർ പാലിക്കണമെന്നും വരും ദിവസങ്ങളിൽ വ്യത്യസ്തമായ പ്രതിഷേധ പരിപാടികൾ സംഘടിപ്പിക്കുമെന്നും അവർ അറിയിച്ചു.
