കണ്ണൂർ: വൈദ്യുതി പ്രതിസന്ധിയുമായി ബന്ധപ്പെട്ട വിഷയത്തിൽ മുഖ്യമന്ത്രി വി.ഡി. സതീശന്റെ നിലപാട് തള്ളി വൈദ്യുതി മന്ത്രി സണ്ണി ജോസഫ് രംഗത്തെത്തി. സ്വകാര്യ കമ്പനിയായ ജി.എൻ.എയുമായുള്ള (GNA) കരാർ പ്രായോഗികമല്ലെന്നും, ഈ പ്രയാസങ്ങൾ ബോർഡ് മുഖ്യമന്ത്രിയെ അറിയിച്ചിരുന്നുവെന്നും വ്യക്തമാക്കിയ മന്ത്രി, മുൻ കെ.എസ്.ഇ.ബി ചെയർമാൻ എം.ജി. രാജമാണിക്യത്തിന്റെ റിപ്പോർട്ടിനെ പിന്തുണയ്ക്കുകയും കെ.എസ്.ഇ.ബി തെറ്റായ റിപ്പോർട്ട് നൽകിയിട്ടില്ലെന്ന് അറിയിക്കുകയും ചെയ്തു.
നിലവിൽ വൈദ്യുതി കരാറുമായി ബന്ധപ്പെട്ട് മുഖ്യമന്ത്രിയുമായി യാതൊരു പ്രശ്നങ്ങളുമില്ലെന്നും മാധ്യമങ്ങൾ തെറ്റായ വാർത്ത നൽകിയതാണെന്നും സണ്ണി ജോസഫ് പറഞ്ഞു. ഇപ്പോൾ പ്രത്യേകിച്ച് പുതിയ വൈദ്യുതി കരാറുകളൊന്നും ഏർപ്പെടുത്തിയിട്ടില്ലെന്നും, ഒരു മാസം മുൻപ് മുഖ്യമന്ത്രിയും താനും എൻ.ടി.പി.സി ചെയർമാൻ ഉൾപ്പെടെയുള്ളവരുമായി നടത്തിയ ചർച്ചയുടെ ഫലമായി കുറഞ്ഞ നിരക്കിൽ സിന്നാർ വൈദ്യുതി നൽകാമെന്ന് അറിയിച്ചിട്ടുണ്ടെന്നും അദ്ദേഹം വിശദീകരിച്ചു.
കേരളത്തിൽ മഴ ലഭിച്ചതും അന്തരീക്ഷത്തിൽ തണുപ്പ് വന്നതും ഉത്തരേന്ത്യയിലെ ശൈത്യവും ദീപാവലി അവധിയും കാരണം ഈ ദിവസങ്ങളിൽ വൈദ്യുതി പ്രതിസന്ധി ഉണ്ടായിട്ടില്ലെന്ന് മന്ത്രി ചൂണ്ടിക്കാട്ടി. എന്നാൽ സംസ്ഥാനത്തിന്റെ വൈദ്യുതി ആവശ്യകത അനുദിനം വർധിക്കുകയാണെന്നും, കഴിഞ്ഞ വർഷത്തേക്കാൾ ആയിരം മെഗാവാട്ട് ആവശ്യകത കൂടിയെങ്കിലും ഉത്പാദനം കുറവാണെന്നും, ഇക്കാര്യം കെ.എസ്.ഇ.ബി ആവർത്തിച്ച് അറിയിച്ചിട്ടുണ്ടെങ്കിലും സമ്മർദം ചെലുത്തിയിട്ടില്ലെന്നും അദ്ദേഹം വ്യക്തമാക്കി. അടൂർ പ്രകാശിന്റെ പ്രസ്താവനകളെക്കുറിച്ചുള്ള ചോദ്യങ്ങളോട് 'ബെറ്റർ ടു അവോയ്ഡ്' എന്നായിരുന്നു മന്ത്രിയുടെ പ്രതികരണം.
