തിരുവനന്തപുരം: ശബരിമല മണ്ഡലകാല തീർത്ഥാടനത്തോടനുബന്ധിച്ചുള്ള ഫെസ്റ്റിവൽ കൺട്രോൾ റൂം ദേവസ്വം ബോർഡ് ആസ്ഥാനത്ത് തുറന്നു. തിരക്ക് നിയന്ത്രിക്കാൻ സാധിക്കുമെന്നും സർക്കാർ ആവശ്യമായ എല്ലാ ക്രമീകരണങ്ങളും ചെയ്തിട്ടുണ്ടെന്നും വ്യക്തമാക്കിയ മന്ത്രി കെ. മുരളീധരൻ

, ദേവസ്വം ബോർഡ് നടത്തുന്ന പ്രവർത്തനങ്ങളിൽ തൃപ്തി രേഖപ്പെടുത്തി.

ദേവസ്വം ബോർഡ് എല്ലാ കാര്യങ്ങളും സർക്കാരിനെ അറിയിച്ചിട്ടുണ്ടെന്നും ബോർഡിന് സർക്കാരിന്റെ പൂർണ്ണ പിന്തുണയുണ്ടെന്നും മന്ത്രി പറഞ്ഞു. ഈ മാസം 16-ന് ശബരിമലയിൽ നേരിട്ടെത്തി ഒരുക്കങ്ങൾ വിലയിരുത്തുമെന്നും അദ്ദേഹം അറിയിച്ചു.

തീർത്ഥാടകർക്ക് സൗകര്യമൊരുക്കുകയാണ് പ്രധാന ലക്ഷ്യമെന്നും അരവണ നിർമ്മാണ വിഭാഗത്തിലെ ജീവനക്കാർ 24 മണിക്കൂറും ജോലി ചെയ്യുകയാണെന്നും മന്ത്രി ചൂണ്ടിക്കാട്ടി. ദേവസ്വം ബോർഡ് പ്രസിഡന്റ് ഈ പ്രായത്തിലും നടന്നാണ് മലകയറുന്നതെന്ന് എടുത്തുപറഞ്ഞ അദ്ദേഹം, നട അടച്ചാൽ ഉടൻ തന്നെ അടുത്ത വർഷത്തേക്കുള്ള ദീർഘകാല പദ്ധതികൾ തയ്യാറാക്കുമെന്നും വ്യക്തമാക്കി.